9. 4. 2024: Новый документ о Андріёви Манайлови з продукції Duna TV
Малярьство – то майже танечный процес, говорить Андрій Манайло.
Мадярьско стало уж в часї бывшого режіму, але пак і по політічных змінах, котры почали в Европі у 1989-ім роцї, новым домовом про доста підкарпатьскых русиньскых родин, котры суть представителями нашого умелецького і інтелектуалного жывота.
Меджі такых представителїв належыть і малярь, ґрафік а общественный русиньскый дїятель Андрій Манайло, якый жыє в місті Вац, і котрый є днесь узнаваным художником нелем в Мадярьску, але і далеко за граніцями.
О тім фактї свідчіть і то, же на кінцю марца 2024-го року мадярьска публічна телевізія Duna TV, в рамках проґраму Rondo, одпремєровала документарный портрет під назвов Художник Андрій Манайло: Од русиньского коріня – ку абстракції.
Андрій Манайло народив ся у 1970-ім роцї, а до Мадярьска перебрав ся жыти в році 1991. Належыть до славного роду русиньскых малярів – ёго дїдо Федор Манайло належав меджі основателїв русиньской Підкарпатьской малярьской школы, продовжовав у тім кумштї, а так само став вызначным малярьом і ёго отець Іван Манайло.
Як сам Андрій Манайло говорить, основы малярьского кумшту дістав у „родинній школї“. В документї, котрый чутливо, аж інтімно приступать ку жывоту і творчости художника, Манайло бісїдує, же як 6-рочный хлопець ішов з дїдом Федором на пленер в Карпатах, де выникнув ёго першый образ.
„Намагав єм ся намалёвати отару овець. Не дуже подарили ся мі. Втогды підійшов ку мі дїдик і – так ся мі відїло – запхав пензлик за шором у вшыткы фарбы на палетї, і дакілько бравурныма мазками ожывив вівцї на полотнї.“
Вытварне уменя пак штудовав у роднім Ужгородї, у Львові, але і на Санкт-Петербурґскій академії.
В документї з продукції мадярьской Duna TV годны сьте ся дізнати, як суть ёго творы, днесь вже меджінародно узнаваного художника, іншпірованы русиньсков народнов културов і родинныма традіціями, як капчать традічны елементы із гляданём модерных форм кумшту, але і то, же одкырвать про себе і можность творїня скулптур попри малёваню, котре є про ёго творчость фундаменталным.
„Про мене малёваня – то радостный, майже танечный процес, де вольно течуть фарбы і радость жывота,“ говорить Манайло у філмі.
Документарный філм Художник Андрій Манайло: Од русиньского коріня – ку абстракції, приближыть позерателям і ёго путь до абстракції, котра, за ёго властныма словами, почала ціклом Бытіє, якый быв присвяченый ёго жывотному юбілею, кедь святковав 50 років.
Но спомяне і далшы ціклы як Вібрації душі, Лазурный берег ці Півночный джез, котры наперек тому, же выникали по тім, што почав путовати по світї і внутрїшнё одкрыв ся тым чуджім впливам, все сохраняють собі і „вібрації Підкарпатя“, котрыма є овпливненый од свого народжіня, і то, як властно соєдинять ся в ёго творчости минувшына із художным языком сучасности.
Дукументарный філм, котрый презентує Андрія Манайла, собі теперь можете посмотрити і на його каналї в службі Youtube з русиньскыма тітулками.
Припоминаме, же Андрій Манайло є лавреатом веце оцїнїнь, і ёго творы суть в збірках дакілько ґалерій в Мадярьску ці на Українї. Выставы мав і на Словакії, але і в далшых країнах Европы, наприклад у Франції.
Анґажує ся і в русиньскім возроднім русї, так в Мадярьску, як і на меджінародній уровни, стрїтити го мож і на Світовых конґресах Русинів. У 2019-ім роцї быв Андрій Манайло єдным із основателїв Націоналной премії за русиньске уменя імени Івана Манайла Pro Arte Ruthenorum, і в рамках той премії дїє як председа журї.
Петро МЕДВІДЬ, ЛЕМ.фм, языкова і ґрафічна управа: АРК в СР
