8. 8. 2016: Убля буде мати турістічный центер

Гранічне село Убля, в окресї Снина, будує поліфункчный турістічный інформачный центер. Одкрытый бы мав быти вже в марцю наступного рока і мав бы словацькым і загранічным турістам давати комплексны інформації потрібны при путованю в сниньскій области, но і при путованю в Закарпатьскій области Україны. Денник Korzár о тім інформовала старостка села і ініціяторка цїлого проєтку Надєжда Сіркова.

Як повіла про денник Сіркова, в селї мають рокы скушеностей із тым, же ся стрічали із турістами, наприклад, із Чехії, Нїмецька, Австрії, котры подорожыли на Україну і приходжали на сільскый уряд, жебы здобыти даякы інформації, што інтересне можуть відїти в Закарпатьскій области Україны, де можуть переночовати, де бы ся могли освіжыти і так подібно. Зато выникла думка зрядити в селї інформачный центер про турістів.

Про замір одкрытя турістічного центра село Убля одкупило од Міністерства внутрїшнїх дїл Словацькой републікы будинок бывшой поліцайной станіцї із фундушом. Село в тім видить, окрем іншого, выгоду так само із той причіны, же будова, о котру ся рокы нихто не старав, ся теперь зреконштруує. В центрї дасть село роботу єдному чоловіку, котрый буде навщівникам давати важны і інтересны онформації.

Проєкт, в рамках котрого выникне турістічный центер, має і своїх партнерів. Нима суть села Великый Березный, Стащін, Колониця, Збій і реґіоналны медії. Вшыткы села, котры суть в проєктї залучены, мають подля думок Сірковой, што понукнути турістам. Із той причіны была о споминаных селах публікована і книжка, в котрій суть здокументованы вшыткы містны памяткы і інтересности. Так само выникнув і новый інтернетовый сайт.

Навщівници села Убля дістануть в центрї інформації і о културных памятках, конкретно і деревяных церьквах, котры находять ся в сниньскій і собранецькій долинах. Обчаньске здружіня Карпатьскы деревяны церькви (Karpatské drevené cerkvi) в сполупраці з партнерами в рамках проєкту Обновлїня деревяных храмів, зъякостнїня інфраштруктуры Біціґлёвой стежкы ікон зреконштруовало пять будов і десять далшых артефактів, котры суть записаны до народных културных памяток, векшынов із 18-го столїтя. Як повіла Сіркова, тоты два проєкты ся взаємно ідеално доповнюють.

Цілём проєкту є звышыти інформованость при розвитку турістікы і пропаґовати головно через реґіоналны медії тоту теріторію на обидвох боках граніцї, на Словакії і на Українї. Проєкт є фінанцованый із норьского фінанчного механізму і сполуфінанцованый з державного розрахунку Словацькой републікы. Цїлковы кошты на выбудованя бы не мали быти веце як 143 тісяч евр.

П. М.