8. 1. 2020: На Богоявленіє в Старій Любовнї служыли в сканзенї, в Якубянах посвятили і потік

В понедїлёк, 6-го януара 2020-го року, восточны хрістіаны, котры ідуть за новым календарём, святковали праздник Богоявленія. Меджі них належать і русиньскы ґрекокатоликы, котры жыють на Словакії.

З той нагоды ся в Старолюбовняньскім окресї одбыли події, котры мають в тій части северовыходной Словакії вже свою традіцію.

Служба в сканзенї

В деревяній Ґрекокатолицькій церькви св. Михаіла Архістратига, котра походить зо села Матисова, в понедїлёк пополудне служыла ся Божественна літурґія, по котрій слїдовало велике посвячіня воды. Церьковнославяньску літурґію служыв любовняньскый парох Ондрей Пацак з Конґреґації Найсвятїшого Ізбавителя (редемпторісты).

По церьковных обрядах, в рамках котрых была і процесія з іконами, слїдовало пасмо колядованя, з котрым выступила фолклорна ґрупа Яворина з Торісок (на фотцї злїва).

Посвятили Якубянку

В Якубянах посвятив ґрекокатолицькый парох Павел Валько по торжественній літурґії і містный потік Якубнянка (на фотцї справа). Іде о стару традіцію, котра ся вже не барз дотримує.

Як повів Валько, в минулости ся вода все посвятила і в потічках ці ріках на парохіях, но з причіны, же водны токы ся зачали забруджати, тота традіція поступно у векшынї парохій цалком счезла. Але то не є припад Якубян, бо сільксый потік є жрідлом воды на питя нелем про містных, але і про села в околіцї, значіть вода є чіста.

„Віруючі собі пак воду з потічка беруть, вірять, же має силу лїчіти, же охранить перед різныма хворотами, помагать їм в різных жывотных сітуаціях,“ повів Валько, котрый є в Якубянах вже девятый рік. Містны віруючі собі за ёго словами беруть воду з Якубянкы приблизно два тыжднії

На посвячіня воды в Якубянцї звыкнуть ходити нелем містны віруючі, але і люди зо сел околіцї, так тому было і тот рік.

Петро МЕДВІДЬ, ЛЕМ.фм, жрідла фотоґрафій: Любовняньскый музей і село Якубяны.