7. 8. 2021: Уповномоченый роздасть селам і містам матеріалы о языковых правах

В юли уряд уповномоченого выдав методічный помічник про крайскы самосправы.

Уповномоченый влады Словацькой републікы про народностны меншыны Ласло Буковскый приготовив із своїм тімом інформачны матеріалы, котры познакомлюють о повинностях самосправ при публікованю інформацій в языку народностной меншыны.

На своїм офіціалнім фанпейджї на сітї Facebook Буковскый інформує, же матеріалы, окрем словацькой верзії, приготовили і в мадярьскім, русиньскім а україньскім языку.

„Вже рокы мам намагу пояснёвати орґанам верейной справы, якы повинности і можливости їм давать меншыновый языковый закон. На стрїчах ся все стрїчам з реакціёв, же як много можностей маєме, а предці не хоснуєме,“ пояснює уповномоченый причіны актівности свого уряду.

Інформачны листы были приготовлены і на основі резултатів послїднёй справы о хоснованю языків народностных меншын. Матеріалы хоче уряд дістрібуовати до сел і міст з тым, жебы їх публіковали на видительнім місцї і пропаґовали меншыновы права.

Як припоминать аґентура TASR, в половинї юла уряд уповномоченого выдав і методічный помічник про высшы теріторіалны цілкы (краї), котрый дотулять ся дотримованя і аплікації языковых прав меншын на уровни самосправных країв.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.