7. 8. 2021: Знова будуть обявлёвати Полонины

У 2020-ім роцї брало участь на події коло 300 людей.

Дістати „під скору“ пахы, смакы, фарбы, звыкы і гумор Полонин і їх жытелів і тот рік можете вдяка зажытковій події під назвов Обявте Полонины.

По минулорочнім пілотнім рочнику, котрого цїлём было помочі містным жытелям представити локалны традіції і спробовати собі службы в турістічнім русї, тот рік ся тота подія одбуде у восьмых селах Сниньского окресу почас вікенду од 13-го до 15-го авґуста 2021-го року.

Аґентуру TASR о тім інформовала Ева Коцанова з обчаньского здружіня Take naše, котре стоїть за проєктом. В минулім роцї на події брало участь скоро 300 реґістрованых навщівників.

Як інформовала Коцанова, такый зажытковый вікенд є на Словакії унікатным концептом, бо на першый погляд то фестівал, но ёго атракції суть розсіяны по селах в цїлій долинї і навщівників так поводить по цїлім сердцї Народного парку Полонины.

Окремы зажыткы выдумали і на події зреалізують векшынов містны жытелї. Тот рік подія буде проходити в селах Стащін, Стащіньска Розтока, Тополя, Рунина, Уліч, Уліч Кривый, Збой і Новоселіця.

В рамках тогорочного проґраму нетрадічного фестівалу буде і коментована прогулька до праліса Рожок, участны навщівлять деревяны храмы, спознають войновы історії і містный фолклор, будуть і ґастрономічны варштаты на выробу татарчаных пирогів або варштаты традічных ремесел заміряных на тканя, роботу з деревом ці вівчов вовнов, але тїшыти ся мож і на много далшого.

Як підкреслила Коцанова, в смыслї утримательности і підпоры містных жытелїв іде аж 80 процент з цїны вступного окремым реалізаторам зажытків.

До проєкту Обявте Полонины залучіли ся і Справа Народного парку Полонины, Словацькый союз астрономів, Словацьке астрономічне общество при Словацькій академії наук, Областна орґанізація турістічного руху Вышнїй Земплін і Вышнїй Шаріш, Крайска орґанізація турістічного руху Северовыход Словакії, Фундація Словацького ґазового промыслу і верейноправне телерадіо RTVS.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: FB/Objavte Poloniny.