6. 8. 2019: Лемківска Ватра на Чужыні была розпалєна 39. раз

В минулый вікенд, в днях 2.-3. серпня/авґуста на західніх землях Польщы, в місцевости Михалів, проходила 39. Лемківска Ватра на Чужыні. Того рока ватру розпалял найстаршый жытель Михалова, Ярослав Шляхтич.

По зложыню квітя через офіцияльны делеґациі, під таблицями, будучыма упамятніньом жертв акциі Вісла з 1947 р., ансамблі Ластівочка і Терочка заспівали пісню «Горы нашы». В першый ватряный ден капітула Стоваришыня Лемків врyчыла нагороду ім. Никыфора – Епифана Дровняка. Статую за заслугы на ниві лемківской культуры і труд жытя отримал долголітній член Стоваришыня Лемків, Іван Дзядик. Нагороду передали ведучый Стоваришыня Лемків Андрий Копча і заступник др габ. Олена Дуць-Файфер, яка выголосила тіж доповід про 30. річницю основаня Стоваришыня Лемків і часопису «Бесіда». На сцені выступили Лeмківскій Ансамбль Пісні і Танця Ластівочка, Молодіжный Ансамбль Музичной Школы в Ліґници, ґрупа Буракы з Вроцлавя та Клюб46. О забаву постарала ся капеля Водограй. В суботу запрезентували ся дітячы ансамблі Ластівчата і Кычерка, были і конкурсы для наймолодшых. Ансамбль Руской Бурсы в Ґорлицях Терочка вказал ся з розшыреным проґрамом – першый раз, окрем співу, запрезентувал і танці. Ансамбль Кычера выступил з проґрамом – «Лемківскє весіля. В хыжы молодой перед шлюбом». Выступило много інчых ансамблів як Розтока, Coolбаба, Надія, н’лем фольк, а забаву заграла Троянда. По забаві, над раном в неділю, было загашено, а тым самым завершено 39. Лемківску Ватру на Чужыні.

 

Наталія КЛИМКОВСКА, ЛЕМ.фм

(Публікуєме в оріґіналї – лемківскім варіантї русиньского языка.)