6. 6. 2022: Першый карпаторусиньскый історік – Iоанникій БАЗИЛОВІЧ (280 років од ёго народжіня)

Іоанникій Базиловіч (Joannicius Basilovits) народив ся 6. 6. 1742 у Гливищах втогдышнёго Угорьского кралёвства, теперь на теріторії Словакії, умер 18. 10. 1821 у Мукачові у тім же кралёвстві, теперь на теріторії Україны. Быв монахом Чіну Василія Великого і поважує ся за першого крапаторусиньского історіка.

По скончіню теолоґічных штудій в Ужгородї і Кошіцях І. Базиловіч вступив до Чіну василіянів. Почас 38 років служыв архімандрітом Мукачовского монастыря св. Миколая. Ёго основна робота „Brevi notitia Fundationis Thedori Koriatovits,..“ (3 томы, 6 частей, 1799 – 1804) была, попри присвячіню Федорови Корятовічови в назві, першов общов історіёв Підкарпатя од найстаршых років до 1789 р.

Інша ёго латиньскоязычна робота „Imago vitae monasticae“ (1802) занимала ся монашскым жывотом, а ёго опис літурґії візатійского обряду церьковнославяньскым языком „Обясненіе літургіі‟ не быв допущеный ку ёго выдрукованю про несхвалїня цензуров. На основі „Brevis notita“, права монастыря на властництво, котре было змінене почас 18. ст., были потверджены стародавны ґрамоты і прівілеґії. І. Базиловіч вірив, же православне духовенство Підкарпатьской Руси прияло Унію у 17. ст. через пересвідчіня про рівность православной і католицькой церькви, а тыж твердив, же Русины суть автохтонным населїнём краю. Ёго выслїдкы выходять з многых документів од 14. до 17. стороча.

Література: Францискъ Тихій, „Іоаникій Базиловичъ‟ – першый дѣеписец Подкарпатской Руси‟, іn Mѣсяцословъ на 1922 годъ (Ужгород, 1921), с. 42-50; Ігумен Василий (Пронин), „Протоигумен Иоанникий Базилович‟, Православная мысль, № 1 (Прага, 1957), с. 40-48; А. Пекар, „Протоігумен Іоаникій Базилович, ЧСВВ – першик історик Закарпаття‟, Analecta Ordinis Sancti Basilii Magni, Series II, Sectio 2, XIV (Рим, 1992) с. 105-122; Дмитро Д. Данилюк, „Іоанникій Базилович (1742 – 1821) – основоположник закарпатської історіографії‟, Carpatica-Карпатика, т. ХІV (Ужгород, 2002), с. 261-272.

Здрой: Проф. ПгДр. Іван ПОП, др. н., „Енциклопедія історії та культури карпатських русинів‟ зоставителїв П. Р. Маґочія і І. Попа, (Ужгород: „Видавництво В. Падяка‟, 2010, с. 34), переклад із україньского языка: А. З.