6. 4. 2023: Зындранівскій музей зас витат туристів

Буде одкрытый лем літньом пором. На осін зас завісит діяльніст.

Початком рока інформували сме, што Музей Лемківской Культуры в Зындрановій рішыл, не по своій воли, завісити частично свою найважнійшу діяльніст – т.є. ведіня одкрытого музейного простору для туристів і заінтересуваных лемківском історийом. Причыном того был брак выстарчаючого фінансуваня той інституциі Міністром Внутрішніх Справ і Адміністрациі.

Тепер, по тримісячній перерві, порогы лемківского музею зас будут одкрыты – літній період для него зачал ся 1. квітня/апріля.

Чом тепер – одповід дост проста

Вертаючы до початку – припомнийме, што кіньцом 2022 р. Міністерство Внутрішніх Справ і Адміністрациі оголосило о высокости ґрантів на меншынову діяльніст, котру ведут поєдны орґанізациі в Польщы, в тым тоты, што занимают ся лемківском обшырю. Дотация, котра трафила до Музею Лемківской Культуры в Зындрановій, была вынятково низка, жебы тот міг вести свою штоденну музейну діяльніст, так як было то до той поры.

Початком 2023 р. ведучый Товариства для Розвитку Музею Лемківской Культуры в Зындрановій Богдан Ґоч інформувал нашу редакцию, што музей отримал фінансове спертя на підметову діяльніст в 2023 р. о 30% менше як в 2022 р. Окрем того аж о 50% зменшена была дотация на цільовы задачы, порівнуючы до попередніх років.

Результатом міністерияльного рішыня было тото, што музейны власти офіцияльно оголосили завішыня постійной і головной діяльности інституциі – закрыли музей для одвиджаючых.

Взновліня музейной діяльности пришло тепер, на тзв. літній період. Певністю зато, што літньом пором дуже легше утримати музейный комплекс (што вяже ся прим. з меншыма коштами). Музей не был в силі фунґувати як одкрыта такой штоденно інституция, і в наслідстві того в зимовым періоді, в тым в часі м.ін. зимовых вакаций, коли вельо туристів з цілой Польщы все заходит на Лемковину, музей был закрытый для одвиджаючых.

Осін і зима – музей буде закрытый

Як мож прочытати на сайті Товариства, через літній період, т.є. в місяцях квітен/апріль – вересен/септембер 2023 р. музей буде одкрытый такой штоденні (з вылучыньом понедільків і окремых святочных дни).

На жаль, дальшым наслідством планной державной підпоры буде тото, што Музей Лемківской Культуры в Зындрановій з наступным осінньо-зимовым періодом зас буде закрытый для одвиджаючых. То уж певне – кєд же така інформация явила ся на сайті Товариства.

Теоретично рішыня о завішыню діяльности на осін могло бы быти змінене, але мусіло бы так стати ся за справом міністерияльной підпоры ци хоц лем допомогы при зміні актуальной ситуациі музею. Хоц музейны власти іщы кінцьом грудня/децембра 2022 р. апелювали в міністерияльных урядників, то не принесло то ниякого результату.

Припомнийме, што Музей Лемківской Культуры в Зындрановій фунґує од 1968 р. Його основаня заініциювал Федiр Ґоч (1929-2018). Днес то найбільшый в Польщы скансен з хыжом, кузньом, каплицьом, вітраком, конюшньом, корчмом, але тіж бібліотеком і архівом, котрый презентує материяльне і духове богатство культуры Лемків.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)