6. 4. 2020: Музеї і ґалерії Пряшівского краю можете навщівити віртуално
Културны заряджіня, котрых зряджовательом є Пряшівскый самосправный край, можете теперь навщівити віртуално. Словацьку пресаґентуру TASR о тім інформовала Леа Геілова з Оддїлїня комунікації і пропаґації Уряду Пряшівского самосправного краю.
К діспозіції є веце як десять переглядок. Службу віртуалной переглядкы на своїх інтернетовых строрінках понукать замок Стара Любовня, Кежмарьскый замок, Татраньска ґалерія в Попраді ці Шарішска ґалерія в Пряшові.
Посмотрити собі мож і Варгола (на фотцї)
„Навщівници ся можуть перейти посередництвом компютера по дворї замку Любовня. На Кежмарьскім замку про зміну можуть відїти інтерьєр замку, музей културы бываня, но і выставкову салу,“ інфмормовала Геілова.
На вебсайті Татраньской ґалерії в Попраді суть к діспозіції віртуалны переглядкы пятёх експозіцій вызначных умелцїів – Мірослава Ціпара, Віктора Фреша, Едуарда Овчачка, Ладїслава Медняньского і Анны Ондрушековой. Службу віртуалной переглядкы штирёх експозіцій понукать і Шарішска ґалерія в Пряшові. Любителї уменя можуть посмотрити ся на выставкы Штефана Гудака, Штефана Костелнічка, Душана Шолца і Енді Варгола.
Музей на дома
„Музеї, котрых зряджователём є Пряшівскый самосправный край посередництвом своїх вебсайтів і соціалной сітї Facebook публікують і вызначны збірковы предметы. В збірковім фондї Крайского музею в Пряшові находить ся понад 100 000 збірковых предметів,“ повіла про аґентуру Геілова.
Вігорлатьскый музей в Гуменнім штартує онлайн проєкт про шыроку верейность зо замірянём на поміч учітелям, родічам, школярям ці штудентам під назвов Музей на дома. На своїй офіціалній сторінці на сіті Facebook, і на офіціалнім вебсайті поступно сприступнить музей людям нетрадічны погляды до своїх експозіцій і приготовить онлайн актівности про розвиток творчого думаня в области історії, етноґрафії і енвіроменталных тем.
Інтересности о музею, місті Кежмарок і ёго вызначных особностях розкрывають Історії предметів, котры Музей в Кежмарку реґуларно публікує на своїй інтернетовій сторінцї.
Серію статей під назвов Історія збіркы о збірковых предметах музею од їх здобытя аж по іншталацію в експозіції публікує і Любовняньскый музей на своїм вебсайтї. Вшыткы актуалны інформації о актівностях музеїв і ґалерій, котрых зряджователём є Пряшівскый самосправный край, можете найти на їх сторінках на сітї Facebook.
Петро МЕДВІДЬ, ЛЕМ.фм, жрідло фотоґрафії: Šarišská galéria v Prešove.
