В лектораті може брати участ каждый, хто лем захоче.

Лемківского языка мож ся буде вчыти на Ягайлоньскым Університеті – поінформувала о тым др габ. Олена Дуць-Файфер, выкладовчыня і знавчыня з обшыри лемківского языка.

Уж о хвилю на найстаршым польскым університеті выстартує лекторат з лемківского языка, якій буде нагодом для вшыткых, што хотят ближе познати тот східньославяньскій язык.

По лемківскы годен каждый

Лекторат лемківского языка веденый буде в Інституті Східньославяньской Філолоґіі ЯУ. Занятя поведе іх думкодавчыня – проф. Дуць-Файфер, яка в своій долголітній науковій працы вельо місця посвячат як раз основам вчыня лемківского языка, ци тіж досконаліня його знаня.

«Першый лекторат лемківского языка реализуваный был уж влони. Товды взяло в ним участ 6 осіб, якы хосенно завершыли навчаня», розповіла проф. Дуць-Файфер. Звідуючы о проґрам вчыня лемківского в рамках лекторату, отримали сме одповід, што часто є то максимально іммерсийне вчыня. Кєд є така потреба, участникы лекторату початково познают лемківску азбуку, а пак мож перейти до дальшых етапів. Як підчеркнула проф. Дуць-Файфер, лекторат є для каждого – незалежно од того, ци даколи мал справу з лемківском бесідом і писаным лемківскым словом.

Явили ся уж першы звіданя од осіб, якы были бы заінтересуваны участю. Предовшыткым (о чым писало ся на фанпейжды Інституту Східньославяньской Філолоґіі в сіти Facebook) занятя направлены сут для студентів, докторантів і науковых робітників ЯУ. Але не є то перешкода, жебы в лектораті взали участ інчы особы – адже і тоты нияк незвязаны з краківскым університетом. Прото запрошены сут вшыткы.

Єдина така можніст вчыня

Лекторат складат ся з трьох семестрів (3 х 60 год.). Занятя зачнут ся в ближучым літнім семестрі академіцкого рока. Навчаня буде в будинку при ул. Інґардена 3 в Кракові (саля 3), в вітіркы (год. 13.15) і четвергы (15.00 год.). Хто охочый – мож ся записати через студентскый секретарият: dorota.krakowska@uj.edu.pl.

«Протягом трьох семестрів мож ся навчыти свобідні бесідувати і писати по лемківскы. А для тых осіб, што знают з хыжы лемківскій, тоты занятя будут практикуваньом языка на вельох полях і взором для інчых, як треба вчыти меншыновых языків» – пояснює Дуць-Файфер.

Пропомнийме, што лемківскій язык в краківскых університетскых порогах завитал першыраз в 2001 р., коли то на Педаґоґічным Університеті (товды: Педаґоґічна Академія) в Кракові стараньом проф. Дуць-Файфер была основана лемківско-русиньска філолоґія. Специялизация фунґувала до 2017 р. І так – хоц на жаль уж не фунґує як окремый напрям університетского вчыня – лемківскій язык вернул тепер в університетскы просторы – од влони є навчаный в рамках лекторату на ЯУ в Кракові, де як професорка працує проф. Олена Дуць-Файфер.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)