6. 11. 2019: Шамбрінцї і Барвінок здобыли Злате пасмо на Замутовскій струнї

Народный освітнїй центер з повірінём Міністерства културы Словавацькой републікы выголошує кажды три рокы цїлодержавне поступове змаганя під назвов „Vidiečanova Habovka“. Іде о перегляд музичного фоклору дорослых, в котрім ся участници змагають в трёх катеґоріях – народны музикы, солісты співаци і інштрументалісты і співацькы ґрупы.

Змаганя мать поступовый характер – успішны участници мусять выграти на реґіоналнім, крайскім а наконець цїлодержавнім змаганю.

Дня 28-го септембра 2019 р. ся крайске змаганя той події орґанізовало в селї Замутов, окрес Вранов над Топлёв, під назвов Замутовска струна. На нїй брало участь пять народных музик, тринадцять співацькых солістів і двох інштрументалістів з різных реґіонї Пряшівского самосправного краю.

Меджі выступаючіма не хыбили і репрезентанты русиньской народностной меншыны, з котрых найлїпше ся презентровала женьска співацька ґрупа Барвінок із Камюнкы.Тота в катеґорії співацькых ґруп здобыла Злате пасмо з пропозіціёв на поступ на цїлодержавне змаганя до Габовкы на Ораву. В тій самій катеґорії здобыла Злате пасмо і мужска співацька ґрупа Шамбрінцї зо Шамброна. Успішным репрезентантам нашой народностной меншыны сердечнї ґратулуєме, женам з Барвінку желаме успіх і на цїлословацькім змаганю Габовкы, котра ся одбуде в днях 16-го і 17-го новембра 2019 р.

Мартін КАРАШ, здрой: Народны новинкы Інфо Русин ч. 19/2019.