5. 9. 2020: Владыка Ніл: „Єм прихылником мукачовской традіції.‟

3-го септембра 2020-го року было на порталї RISU – Релігійно-інформаційна служба України, публіковане перше інтервю з новым апостолскым адміністратором Мукачовской ґрекокатолицькой єпархії, владыком Нілом Лущаком (на фотцї).

В інтервю, котре вышло під назвов Хочеме завершыти розпочаты справы владыкы Мілана, і котре робив Александер Гаврош, одкрыла ся і тема, о якій ся довгый час бісїдує, а одкрывають єй проукраїньскы кругы і внутрї церькви. Іде о єствованя окремой русиньской єпархії на теріторії Україны.

Україньска ґрекокатолицька церьков (УҐКЦ) вже пару раз за остатнїх 30 років намагала ся „вырїшыти“ дїло окремой Мукачувской єпархії, котра є в Римі записана як церьков свого права (sui iuris) русиньской традіції, значіть є незалежнов церьковнов штруктуров од Києва, арґументуючі, же в єдній державі не можуть быти дві різны ґрекокатолицькы церькви. Дотеперь Рим, єднако як і мукачовскы єпіскопы не припущали, жебы Мукачовску єпархію приїли до складу УҐКЦ – церькви іншой традіції.

О тім, яка буде судьба Мукачовской єпархії ся зачало говорити знова по смерти мукачовского єпархы, владыкы Мілана Шашіка. Гаврош в інтервю споминать, же ся точіть діскусія о можливім „соєдиненю Мукачівской єпархії з УҐКЦ,“ і споминать, же римокатолици ся вже соєдинили і вытворили єдну штруктуру на Українї. Владыка Ніл ся в інтервю приголосив ку тому, же є прихыльником мукачовской традіції, чім дав сіґнал, же із приєднанём Мукачова до УҐКЦ не є согласный.

„То не простый вопрос. Многых знепокоює. Владыка Мілан все боронив мукачовску традіцію. Така є позіція і Апостольского престола. Я так само прихылником той лінії. То была наша одкрыта позіція,“ повів у інтервю новый апостолскый адміністратор.

Владыка Ніл Лущак быв помічным єпіскопом Мукачовской ґрекокатолицькой єпархії од новембра 2012-го року, коли быв выменованый Папом римскым Венедіктом XVI. Єпіскопске рукуположіня прияв в януарї 2013-го року. За апостолского адміністратора єпархії быв выменованый Папом римскым Франціском 20-го юла 2020-го року, в день похорону мукачівского єпархы Мілана Шашіка, котрый нагло вмер 14-го юла.

Петро МЕДВІДЬ, ЛЕМ.фм, жрідло фотоґрафіЇ: Греко-Католицьке Закарпаття, языкова управа: ред. АРК в СР.