5. 9. 2017: Фестівал „UM UM“ тот рік і о Русинах

В Старій Любовнї ся в днях 8-го аж 10-го септембра 2017-го року одбуде вже шестый річник фестівалу „UM UM‟. Фестівал незалежного сучасного уменя тот рік має тему – Русины, Словаци і Стара Любовня.

 

Як у пресовій справі інформують орґанізаторы фестівалу, од юбілейного пятого річника є фестівал присвяченый темі одношіня Словаків і іншых народностей або етнічных ґруп, котры роками жыли довєдна в тій околіцї і вытворюють довєдна історію і културу того реґіону. Тот рік фестівал заміряв ся на Русинів.

Орґанізаторы ся на фестівал приготовлёвали цїлый рік. Навщівили дакілько фолклорных фестівалїв в окресї Стара Любовня, так само на выходї Словакії навщівили дакілько деревяных церьквей і монастырів, музеїв ці інштітуції. Штудовали тематічну літературу і філмы. Стрітили ся з десятками вызначных людей, з котрых многы прияли запрошіня выступати на тогорічнім фестівалї. Якраз тых людей будуть годны відїти нажыво і участници фестівалу в рамках бісїд, промітаня філмів, театралных пєс, музичных вечорів або в рамках вернісажі першого річника вытварного сімпозія, котрый одбуде ся коло фестівалу, і котрый має назву „SYMPOSIUM PICTUM‟.

 

В проґрамі фестівалу не буде браковати інсценація Гавай, котру має в репертоарї Театер Александра Духновіча в Пряшові, ці філм Осадне. Промітати ся будуть і філмы о Підкарпатьскій Руси.

 

Фестівал так само як влони принесе і премєру постдраматічной пєсы, котра выникла на мотівы досправдового повіданя з історії Старой Любовнї. Режісерка і головна орґанізаторка фестівалу Маріка Смрекова дала довєдна міджінародну ґрупу творцїв, котрой членове на два тыжднї пришли до Старой Любовнї, жебы вытворити пєсу з назвов EYEKON(TACT).

„Іншпіраціов на пєсу были православны іконы, котры з давных часів творять часть нелем нашой, але і европской ці світовой културы,“ пише ся у пресовій справі.

 

П. М.