5. 3. 2024: В рамках тыждня бібліотек презентація Валерія Падяка

Од понедїлька, 4-го марца 2024-го року, проходить цїлословацька подія Тыждень словацькых бібліотек. То вже 25-ый рочник той події, котра тот рік має мотто Бібліотекы про вшыткых.

В рамках тыждня бібліотек приготовила Державна наукова бібліотека в Пряшові подію під назвов Стара русиньска література – по новому. Іде о лекцію высокошкольского педаґоґа Доц. Мґр. Валерія Падяка, к. н. (на фотцї), котра буде скапчана з бісїдов і презентаціёв книг із авторьского і выдавательского дїятельства Падяка.

Подію орґанізує Оддїлїня історічных фондів Державной науковой бібліотекы в Пряшові, і є повязана з презентаціёв проблематікы баданя славістікы, історічных русинік, выдаваня оріґіналной творчости особностей в новім выготовлїню Валерія Падяка.

Презентація одбуде ся в середу, 6-го марца 2024-го року о 16.00 год., в просторах бібліотекы в Пряшові.

Валерій Падяк (1959 р., Ужгород) здобыв освіту на Ужгородьскій державній універзітї в шпеціалізації на російскый язык і літературу. Кандідата філолоґічных наук оборонив на Інштітуті літературы Т. Г. Шевченка Академії наук Україньской совєтьской соціалістічной републікы в Кієві, а доцентуру на Універзітї Коменьского в Братїславі.

Од 2010-го року робить як высокошкольскый педаґоґ в Інштітуті русиньского языка і културы Пряшівской універзіты, котрый днесь належыть під Центер языків і култур народностных меншын ПУ.

Падяк сістематічно занимать ся проблематіков старшой і сучасной русиньской літературы і културы, русиньсков драматурґіёв і професіоналным театром. В Ужгородї має властне выдавательство.

Петро МЕДВІДЬ, ЛЕМ.фм, языкова і ґрафічна управа: АРК в СР.