5. 3. 2020: Русиньскы публикациі на Медженародных Торгах Книжкы в Новым

Од 3. до 9. марця 2020 р. в Новым Саді в Сербіі проходят Медженародны Торгы Книжкы. 5. і 6. марця презентувати будут чысленны русиньскы публикациі.

Своі выдавництва перше представит Дружство за русиньскій язык, літературу і культуру. Книжкы презентуваны будут уж заран, 5. марця, од 16.00 год. В пятницю, 6. марця, од 13.00 год. своі публикациі вказувала буде Новинарско-выдавнича Oрґанізация «Рускє Слово», а од 14.00 год. Інституция за Культуру Русинів.

На промоцийных стрічах вказуваны будут книжкы печатаны в минулым році, м.ін. другій том «Руснаків» авторства Дюры Латяка, збірник поезиі Славка Романа Рондо «Одняти од псох» ци книжкы з поезийом, піснями, приповідками для діти, прим. «За главкы у лавкы» Ірины Гарди Ковачевич, «Босы по праху» Сильвестра Макая, «Iжык голик» Юлияна Тамаша, книжочка з образками «Веселый буквар» др. Бориса Варґа, Анамариi Рамач Фурман і Мариі Ковачевич ци збірник літературы молодых 2010-2020 «Гумно 2: Діти з дружтвеных мрежох».

На промоциі присутны будут авторы книжок і рецензенты – буде то нагода, жебы побесідувати о выданых уж книжках, але і о перспективах розвитку літературы по русиньскы.

Наталія МАЛЕЦКА-НОВАК, ЛЕМ.фн

(Публікуєме в оріґіналї – лемківскім варіантї русиньского языка.)