5. 12. 20250: Ден Русинів упамятненый молитвом за бл.п. Богдана Ґамбаля

Члены Кружка Стоваришыня Лемків постановили упамятнити нацийональне свято Лемків – Ден Русинів в Польщы, котрый призначеный єст на 5. грудня/децембра в чест фльориньского віче, через спільну молитву за покійного Богдана Ґамбаля (1965-2020).

По Божескій Літургіі, котра была в пятницю, 4. грудня/децембра 2020 р., в православній церкви св. Тройці в Любіні, яка была одслужена з нагоды Дня Копальника, члены стоваришены в любіньскым кружку стрітили ся довєдна, штобы спомнути на лемківскы справы, історию та теперішні часы. Пак члены пішли на любіньскій цмонтір, де похороненый єст Богдан Ґамбаль, долголітній ведучый Стоваришыня «Руска Бурса» в Ґорлицях і думкодавця основаня першого лемківского радия ЛЕМ.фм. Небіщык Ґамбаль был так само долгы рокы членом як раз любіньского Кружка СЛ, з котрого – як делеґат – был участником вельох конґресів СЛ. Ґамбаль як першый в Польщы розпропаґувал ідею празднуваня Дня Русинів.

Як бесідує єден з членів любіньского одділіня: «Богдан Ґамбаль был чловеком великого формату, был барз знаный для лемківского світа і не лем. Вічна Памят, Богдане! Ден памяти Республикы, проклямациі во Фльоринці, на все остане в нашій памяти і укріпит нас на будуче».

Бл. п. Богдан Ґамбаль вродил ся в Польковицях близко Любіна. Студиювал в Кракові. Пак остал гын, одкале близко мал на своі рідны землі – Карпатску Русь. Вмер 2. липця/юлия 2020 р. Похороненый был 8. липця/юлия 2020 р. на чужыні в Любіні.

Севериян КОСОВСКЫЙ, лем.фм

(Публікуєме в оріґіналї – лемківскім варіантї русиньского языка.)