5. 12. 2019: Oдбыв ся 55. семінар карпаторусиністикы

4. грудня/децембра 2019 в Інституті Русиньского Языка і Культуры Пряшівского Університету одбуде ся уж 55. семінар карпаторусиністикы. Темом стрічы зо світа русиньской наукы буде особа Анатолия Кралицкого, монаха василияньского чыну, педаґоґа, писателя, історика, етноґрафа і фольклористу на Підкарпатскій Руси.

Семінар традицийно одбуде ся в бібліотеці карпаторусиністикы, яка находит ся в просторах Інситуту. З лекцийом на тему Незнаны місця в біоґрафіі Анатолия Кралицкого і його народно-языковы орієнтациі выступит мґр Валерий Падяк з Інституту Русиньского Языка і Культуры Пряшівского Університету.

Як каждый раз, так і тепер, в проґрамі семінара буде тіж презентация найновшых выдань з обшыри карпаторусиністикы.

Анатолий Кралицкій

Анатолий Кралицкій (світскє мено Александер Кралицкій, псевдонімы: І. Васильевічъ, Асколдъ, Иванъ Нодь) вродил ся 12. лютого/фебруара 1835 р. в Выжніх Чабинах (днес Чабины), котры ся находят на териториі Словациі, товды Угорского Королівства. Кралицкій был грекокатолицкым монахом – Василиянином. Был педаґоґом, писательом-істориком і етноґрафом. Знаный єст тіж зо свойой роботы як фольклориста на Підкарпатскій Руси. Мало хто знає, што Кралицкій был фотоґрафіком.

Кралицкій был на своій дорозі стрітил великого Будителя Русинів, Александра Духновича. Был його учеником. Як народный будитель періоду пізного романтизму проявлял ідею панславяньской єдности, в чым достерігал можливіст выратувати Русинів од мадяризациі і народной асиміляциі.

Вмер 11. лютого/фебруара 1894 р. в Мукачеві. В своім рідным селі, в Чабинах, має свій памятник. Перша школа з русиньскым навчальным языком на Словациі, котра выникла як раз в Чабинах, є присвячена тому вызначному родакови.

Севериян КОСОВСКЫЙ, ЛЕМ.фм

(Публіклуєме в оріґіналї – лемківскім варіантї русиньского языка.)