5. 11. 2019: Богата русиньска културна осінь

Тогорічна осінь досправды богата на русиньскы културны події. Відїти буде мож нажыво Рутенію, Штефана Штеця, тїшыти ся мож і на новы выставкы в Словацькім народнім музею – Музею русиньской културы в Пряшові, а і много далшого.

Выбрали сьме про вас тоты найнтереснїшы події, котры маєме в місяцях новембер і децембер 2019-го в мерьку.

 

Земля обіцяна

Русиньскый Фолклорный ансамбель Рутенія з Братїславы ся почас осени представить на выходї Словакії із своїм найновішым проґрамом, котрый дістав назву Земля обіцяна. Іде о танечно-драматічну інсценацію, в рамках котрой можете відїти на сценї і познаты твари акторів. 

Земля обіцяна приближує публіцї дії, котры в Чехословакії проходили по Другій світовой войнї. Іде о такзваны оптації, в рамках котрых ся тісячі людей, главно русиньской народности з выходной Словакії, на основі лживой пропаґанды добровольно приголосили выселити ся на теріторію Совєтьской Україны. Веце о пєсї мож прочітати ту.

Рутенія своє турне зачінать в другій половинї новембра і представить ся в пятёх выходословацькых містах. Дня 23-го новембра 2019-го року зачне турне в Пряшові, де ансамбель представить ся в просторах Театру Александра Духновіча, о день пізнїше на Землю обіцяну може тїшыти ся кошыцька публіка в Театрї Талія. Першый децембровый вікенд буде мож відїти Рутенію в Левочі (6-го децембра) і почас слїдуючіх двох днїв у Свіднику і Старій Любовнї. Тікеты на турне дають купити ся через портал rezervovane.sk.

 

Štefan Štec & Fajta TOUR Jeseň 2019

І харізматічный русиньскый співак Штефан Штець зачінать уж в середу своє турне по словацькых містах. Вєдно із своёв ґрупов Файта представлять публіцї найсвіжішы новоты і несподїванкы з приготовлёваного албуму, котрый бы мав выйти кінцём рока під назвов Дує вітор. Хыбити не будть ани найвекшы гіты.

ЛюбителЇ Штефана Штеця ся можуть в рамках турне тЇшыти і на далшы інтересны мена, котры будуть выступати як гостЇ в окремых містах.

Турне зачінать 6-го новембра в Історічній радніцЇ в Кошіцях, 9-го новембра привітать Штефана Штеця Atelier Babylon в Братїславі, 16-го новембра го можуть відїти Пряшівчане в просторах Кіна Scala i новембровы выступлїня будуть закінчены у Зволенї 24-го новембра, в Домі културы Podobrová. На децембер є іщі напланованый концерт в Снинї, конкретно 7-го децембра в містнім Домі културы. Тікеты мож купити на сайтї predpredaj.zoznam.sk.

 

Події русиньского музею

І Словацькый народный музей – Музей русиньской културы в Пряшові приготовив на осінь богатый проґрам. На місяцї новембер і децембер уж суть напланованы три інтересны події.

Наш музей найблизше позывать на далшый новый проєкт, котрый дістав назву Музей місту і селу, Місто і село музею. Дня 12-го новембра о 16.00 год. представлять ся в музею штири села Меджілаборецького окресу: Радвань над Лабірцьом, Воліця, Збудьска Біла і Валенітвіцї.

Старина – вода віры, то выставный выбер фотоґрафій з проєктів Руснаци (рр. 2006 – 2007) і Свідоцтво спід Пляшы (рр. 2011 – 2016). Є то фотодокументація о выселенцях з области сел, котры затопили з причіны будованя водного резервоару Старина. Выставка буде одкрыта 21-го новембра і потырвать до 21-го януара 2020-го року.

На децембер музей приготовив выставку під назвов Дубайовы. Вернісаж творів знамого вытварницького роду одбуде ся 5-го децембра і выставка потырвать до 5-го мая 2020-го року.

 

Події орґанізації молоды.Русины

Орґанізація молоды.Русины сердечно запрошать найблизше довєдна ся молити на Божественній літурґії, котра ся одбуде у віторок, 12-го новембра, o 19:00 на інтернатах на уліцї Єдлікова 7 в Кошіцях. Церьковнославяньску літурґію буде служыти протосінкел Кошыцькой ґрекокатолицькой єпархії отець Ярослав Лайчіак з чітанём євангелія і проповідёв у русиньскім языку. По літурґії слїдує діскусія на тему Святый мученик Йозафат, мучеництво як свідоцтво віры і правды.

Молоды позывають і на співацько-театралне выступлїня під назвов Рік на селі. В проґрамі вам выступаючі представлять різны обычаї, звыкы, обряды і піснї, котры были вызначнов частёв жывота людей почас цїлого року. Тїшыти ся можете на ФСҐ Вородай з Великого Липника, ФҐ Кечера з Якубян і співачку Наталію Кучову з Літмановой. Подія одбуде ся 16-го новембра в Културнім домі в Іглянах зо зачатком о 18.00 год.

Ани тот рік не буде хыбовати подія під назвов Вечур русиньскых голосів, котру приготвлюють молоды.Русины. Одбуде ся 26-го новембра o 18.00 год. в просторах Універзітной бібліотекы Технічной універзіты в Кошіцях. Можете ся тїшыти на Фолклорну ґрупу Яворина з Торисок, Катедралный хор св. Кіріла і Мефодія з Кошыць і ґрупу RuSnack‘s з Пряшова. Вечoром буде проводити Володимір Чема.

 

Інтересны події і в Празї

І в Празї будуть в найблзшім часї інтересны події, котры повязанаы із Русинами. Вже 6-го новембра запрошать Общество приятелїв Підкарпатьской Руси на бісїду з Іваном Латком, председом Клубу Томаша Ґаріка Масаріка в Ужгородї, выдавателём і вызначным підкарпатьскым актівістом. Темов бісїды будуть події на Підкарпатю присвячены сторічніцї приєднаня реґіону ку Чехословакії, сучасна сітуація, чеська і словацька меншына на Підкарпатю і їх общества. Подія зачінать о 16.30 год. в Домі народностных меншын на уліцї Воцелова 3 в Празї.

20-го новембра в Празі одбуде ся презентація книжкы Барборы Заваділовой під назвов Моя русиньска вышыванка. О тій книжцї писали сьме уж скорїше. Авторка свою книжку одпрезентує в Ґалерії Дому народностных меншын і зачаток події є о 17.00 год.

Остатня подія, на котру варто іти, покля маєте можливость, то Округлый стіл на тему Підкарпатьска Русь і Русины в чеськых землях. Орґанізаторами округлого стола суть Академія народностных меншын і Общество приятелів Підкарпатьской Руси. Подія одбуде ся 4-го децембра в Домі народностных меншын і тематічны округы суть: Підкарпатьска Русь в рамках Чехословакії 1919 аж 1939 рр. – Русины в меджівойновім періодї, Русины/Українцї по Другій світовій войнї в Чехословакії і Русины в Чехословакії по 1989-ім роцї.

Петро МЕДВІДЬ, ЛЕМ.фм