5. 1. 2022: Літературный конкурз выграла Людмила Шандалова

У 2021-ім роцї Сполок русиньскых писателїв Словеньска у сполупраці з Академіёв русиньской културы в Словацькій републіці і Інштітутом русиньского языка і културы Пряшівской універзіты в Пряшові зорґанізовав 8-ый рочник Літературного конкурзу Марії Мальцовской.

З причіны продовжуючой пандемії і з тым повязаныма обмеджінями і резултаты того рочника были выголошены лем онлайн, єднако як в попереднїм роцї. Найлїпшы, дотеперь непублікованы творы од русиньскых авторів із Словакії сьме могли спознати у онлайн высыланю в послїдній день минувшого року, 31-го децембра.

В конкурзї быв і драматічный твор

Як в рамках выголошіня резултатів інформовала Кветослава Копорова, председкыня Сполку русиньскых писателів Словеньска, до 8-го рочника конкурзу, котрый має назву по вызначній русиньскій писательцї Марії Мальцовскій, ся приголосило довєдна девять авторів. Тот рік окрем прозаічных творів і поезії так само быв приголошеный драматічный текст, котрый в рамках святочного выголошіня одзвучав обробленый у формі радіовой пєсы.

З прозов до конкурзу приголосили ся Штефан Смолей, Марія Шмайдова і Мірослав Жолобаніч. Поетічны творы загнали Мілан Ґай, Гелена Ґіцова-Міцовчінова, Юрко Харитун, Елена Хомова-Гріньова і Людмила Шандалова. З драматічным текстом під назвов Місія представив ся в конкурзї Владислав Сивый.

Тричленна порота вырїшыла, же перше місце  у 8-ім рочнику Літературного конкурзу Марії Мальцовской належыть за поетічны творы Людмилї Шандаловій (на фотцї). Друге місце обсадив Владислав Сивый із своїм драматічным твором, третє місце присудила журї Еленї Хомовій-Грінёвій.

Людмила Шандалова

Людмила Шандалова (1964 р.) має дотеперь выданы штири книжкы. Збірку дітячїх стишків Подьте, дїти, што вам повім (2014 р.), прозу Червеный берег (2016 р.) і далшы дві збіркы поезії про дїти під назвами Ани бы сьте не вірили (2018 р.) і Напю ся водічкы (2020 р.). Окрем того написала пять театралных дїтьскых пєс.

У 2015-ім роцї дістала за свій дебут Премію Александра Духновіча за русиньску літературу. У 2017-ім роцї за прозу Червеный берег удїлив їй словацькый Літературный фонд Цїну Александра Павловіча.

Перше місце в Літературнім конкурзї Марії Мальцовской здобыла уж в роцї 2019. У 2021-ім роцї здобыла їй книжка духовной поезії про дїти Напю ся водічкы Цїну публікы в рамках інтернетового голосованя в конкурзі з назвов Книжкы рока Пряшівского самосправного краю 2020.

Петро MEДВІДЬ, ЛЕМ.фм, ґрафічна і языкова упртава: ред. АРК в СР.