4. 5. 2016: Одбыв ся 36. семінар карпаторусиністікы

4. мая 2016 ся одбыв далшый із серії семінарів карпаторусиністікы. Выступив на нїм професор Осиф Сіпко, ПгД., із Інштітуту русістікы Філозофічной факулты Пряшівской універзіты у Пряшові. Тема семінара – З лінґвокултуролоґії Русинів была про дакотрых участників семінара незнамов, бо з научнов дісціплінов – лінґвокултуролоґіов ся многы іщі не стрїтили. Професор Осиф Сіпко є єдиным шпеціалістом в рамках ПУ, котрый ся данов научнов дісціплінов занимать як бадатель довгы рокы в рамках лінґвокултуролоґії російского языка. Наконець, свідчіть о тім ёго міморядна публікачна продукція – є автором пятёх моноґрафій з области лінґвокултуролоґії і стовок научных статей.

Професор Сіпко є за походжінём Русин (із села Камюнка, окр. Стара Любовня), зато ай дакілько штудій з области лінґвокултуролоґії написав в одношіню к Русинам і їх културї, одбиваючій ся в языку Русинів. На семінару ся мож было дізнати, же кідь в лінґвокултуролоґії Росіян ся одбивать  передовшыткым літературна творчость такых світовых великанів якыма были Пушкін, Лермонтов, Ґоґоль...., то Русины такым богатством умелецькой літературы світового значіня не діспонують. Баданя в области лінґвокултуролоґії односно Русинів мож оперти на їх богатый пісенный фолклор. Чоловік – любов – природа. То є тріада знаків, з котрыма мож нарабляти при баданях русиньскых народных співанок і їх одбитю в языку Русинів. Чого Русины не мають у своїм репертуарї народных співанок напр. козацькы, або боёвы піснї – ай такы вопросы выяснив выступаючій гость на семінарї – проф. Осиф Сіпко.

Конець семінара быв, як традічно венованый презентації найновшых публікацій з области карпаторусиністікы, котры представила Мґр. Зденка Цітрякова. Віриме, же послїднїй в тім академічнім роцї семінар ся став іншпіратівным ай про будучіх штудентів – докторандів, котры будуть мати інтерес робити свої научны баданя з области лінґвокултуролоґії, заміряны  на Русинів і їх културу. На далшы семінары карпаторусиністікы позываме на осїнь – в новім академічнім роцї – з інтересныма темами і новыма выступаючіма.

ПгДр. К. Копорова, ПгД., Центер языків і култур народностных меншын – Інштітут русиньского языка і културы ПУ у Пряшові