4. 2. 2020: Світова рада буде засїдати в Румунії. Одсвяткуть юбілей тамтешнёй русиньской орґанізації

29-го фебруара 2020-го року одбуде ся в Сучаві в Румунії 3-тє засїданя Світовой рады Русинів у меджіконґресовім періодї по XV. Світовім конґресї Русинів.

Участны засїданя будуть брати участь і на святкованю 20-го юбілею Културного общества Русинів Румунії (оріґ. Культурне товариство русинів Романії), котре є од 2003-го року членом конґресу. Орґанізація, котру од основаня веде Ґеорґій Фірцак, з той нагоды притоволює святочны події, котры будуть проходити од 27-го фебруара до 1-го марца.

Засїданя без комісій

Як інформовав председа Світового конґресу Русинів Штефан Лявинець, найблизше засїданя Світовой рады буде проходити без засїдань окремых конґресовых комісій.

В проґрамі находить ся, наприклад, обговорїня святкованя Світового дня Русинів, котре буде проходити 23-го марца на Словакії і святкованя 30-ой річніцї од основаня Русиньской оброды на Словеньску, основаючого члена конґресу. Член Світовой рады Русинів за Україну Микола Бобинець має на радї інформовати о списованю населїня, котрый тот рік проходить на Українї по скоро 20-ёх роках.

О діяльстві Світового форуму русиньской молодежи бы мав у Румунії інформовати подля проґраму ёго председа Петро Ярінчік. Членове Світовой рады будуть занимати ся і пропозіціями а крітеріями на тогорічне удїлїня Премії Василя Турка-Гетеша.

20 років общества

Участны будуть брати участь і на святкованях юбілею своёй членськой орґанізації за Румунію – Културного общества Русинів Румунії. Общество было засноване в році 2000 з ініціатівы Ґеорґія Фірцака, котрый дакілько місяцїв по тім став посланцём румуньского парламенту як представлитель Русинів.

Центер общества находить ся в містї Дева і має свої філії в пятёх реґіонах – Алба, Клуж, Гунедоара, Марамуреш і Сучава. Меджі цїлї орґанізації належыть пропаґація меджі Русинами інтересу о културу предків і самоусвідомлїня ці інформованя румуньской сполочности о існованю Русинів як окремой народности. Общество то реалізує головно посередництвом лекцій, културных подій, публікованьом інфомачных матеріалів і книжок в румуньскім і русиньскім языку, ці каждорічным орґанізованьом Дня Русинів Румунії.

В Деві, де є головный центер юбілуючой орґанізації, проходив у 2015-ім році ХІІІ. Світовый конґрес Русинів.

Петро МЕДВІДЬ, ЛЕМ.фм