4. 12. 2021: Юбілейна выставка Атаназа Фединця

В Русиньскім ґрекокатолицькім центрї в Дебрецінї-Ёвжі, в Мадярьску, Вседержавне русиньске самосправованя одкрыло 2-го децембра 2021-го року юбілейну выставку русиньского маляря Атаназа Фединця.

Выставка, котра буде приступна аж до зачатку юла слїдуючого року, мала свою вернісаж якраз в день, коли сьме собі припомянули 85-ту рочніцю народжіня русиньского авантґардісты. На вернісажі участным приговорила ся Віра Ґіріц, котра є посланкынёв за Русинів у мадярьскім парламентї, і малярь Томаш Асталош.

Атаназ Фединець (2. 12. 1936 р. – 3. 11. 2012 р.) народив ся в Ужгородї в родинї вызначного хірурґа Александра Фединця. Єднако як нянё, і він выштудовав медицину в Ужгородї і став рентґенолоґом. Наперек выштудованій професії зачав занимати ся наперед фотоґрафіёв, пак малёванём. У 1973-ім роцї закінчів єднорочну Одеську школу умень.

З умелецькым середовиском збылижыв ся іщі почас своїх штудентьскых часів. Іншпіровали го старшы майстры, представителї русиньской підкарпатьской школы малёваня, Федор Манайло і Антон Кашшай, котрых особно знав. В умелецькых кругах быв знамый під псевдонімом Фруці (підписовав ся так і на образы).

У 1980-ім роцї еміґровав до Мадярьска. Там актівно занимав ся малёванём, быв членом Народногйо общества умелцїв Мадярьска, Клубу умелцїв Корвін і Общества умелцїв Енді Варгола. У своїм властнім домі одкрыв ґалерію. Атаназ Фединець брав актівну участь на културных подіях русиньскых орґанізацій в Мадярьску.

На своїх полотнах розкрывав найтаёмнїшы части своёй душі, образами розповідав, якым він видить околишнїй світ. Експеріментовав із формов, одтінками і текстуров. В 1970-ых роках быв вызначным представителём аванґардной умелецькой богемы Закарпатя.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.