4. 11. 2022: Презентація русиньского уменя в Будапештї

12-го новембра 2022-го року одбуде ся в Салї ґрофа Мигаля Естергазія в будапештаньскім Каштелю Штефанія вже пятый рочник події під назвов „Шедевры русинського умілства‟.

Орґанізаторами той події суть посланкыня Парламенту Мадярьска за русиньску меншыну Віра Ґіріц, Вседержавноє Русиньскоє Самосправованя, Вседежавноє Общество Русинув/Рутенув Мадярщины, Общество Русинськуй Културы і Фундація „За Русинув“.

На події будуть одпрезентованы різны области русиньской културы і уменя. Участны будуть годны посмотрити собі юбілейну выставу єдного із найвызначнїшых нашых малярів Атаназа Фединця, выступати будуть оперный співак Золтан Дараґов, Анна і Марія Бан, Молодежный фолклорный ансамбель Русины і школярї мучоньской Ґрекокатолицькой основной школы святого Петра.

Главным покровителём русиньской події є заступник віцепремєр Мадярьска Жолт Шемєн, вєдно з ним покровительство взяли председа парламентной фракції Хрістіаньско-демократічной народной партії Іштван Шімічко, котрый на події і приговорить ся участникам, а посланкыня Віра Ґіріц.

Атаназ Фединець

Народив ся Атаназ Фединець у 1936ім роцї в Ужгородї в родинї выдатного хірурґа Александра Фединця. Єднако як нянё і він выштудовав медицину на Ужгородьскій державній універзітї і став рентґенолоґом. Наперек выштудованій професії зачав занимати ся наперед фотоґрафіёв, пак малёванём.

Іншпіровали го старшы майстры, представителї русиньской підкарпатьской школы малёваня: Федор Манайло і Антон Кашшай, котрых особно знав. В умелецькых кругах быв знамый під псевдонімом Фруці (підписовав ся так і на образы).

У 1980-ім році еміґровав до Мадярьска. Там актівно занимав ся малёванём, быв членом Націоналного общества малярїв Мадярьска, Клубу малярїв Корвін і Общества малярїв імени Енді Варгола. У своїм властнім домі одкрыв ґалерію. Брав актівну участь на културных подїях русиньскых орґанізацій в Мадярьску.

Образы Атаназа Фединця были выставлены на многочісленных выставках в Мадярьску, на Підкарпатю, в Австрії, Нїмецьку ці Швеції.Умер у 2012 роцї.

Петро МЕДВІДЬ, ЛЕМ.фм. Ґрафічна і языкова коректура: АРК в СР.