4. 11. 2021: Перед 20-ма роками выголосили єпіскопа Ґойдіча за блаженого
Намагы о беатіфікацію трьох русиньскых єпіскопів зачали в Піттсбурзькій метрополії.
Двадцять років тому, 4-го новембра 2001-го року, в Римі на Намістю святого Петра были выголошены за блаженых двоми ґрекокатолицькы мученици за віру – пряшівскый єпарха Павел Петро Ґойдіч і єромонах Методій Домінік Тырчка.
Як інформовав говорця Пряшівской архієпархії Михал Павлишіновіч, почас септембровой навщівы Папы римского Франціска в Пряшові были мощі блаженых уложены в престолї, „чім іщі веце зміцнило ся значіня їх мученицькой смерти якраз про вірность Святїшому Отцёви.“
Рочніцю выголошіня за блаженых собі днесь припомянула Пряшівска архієпархія торжественнов архієрейсков літурґіёв, котру одслужыть в Катедралнім соборї св. Іоана Крестителя архієпіскоп метрополіта Іоан Бабяк.
Першы намагы зачали в Америцї
Як інформовав Павлишіновіч, першы намагы о беатіфікацію єпіскопа Ґойдіча зачали в Споєных штатах Америкы, кедьже в Чехословакії быв тоталітный режім, котрый бранив реліґійній слободї.
„Кавзу владыкы Ґойдіча ініціовала Піттсбурґска метрополія в Споєных штатах Америкы, котра у 1983-ім роцї адресовала до Рима пропозіцію на процес беатіфікації єпіскопів Павла Петра Ґойдіча, Теодора Ромжы і Василя Гопка. Конґреґація про кавзы святых выдала на жадость Піттсбурґской метрополії Nihil obstat (нїт зеперечінь) на зачатя процесу їх беатіфікації,“ інформовав говорця архієпархії.
Поступно здобыты знаня і матеріалы в тій кавзі пізнїше з Піттсбурґу передали втогдышнїй Пряшівскій єпархії, кедьже по 1989-ім роцї змінив ся режім і Ґрекокатолицька церьков знова могла наповно фунґовати і в бывшых соціалістічных країнах.
По 110-ох роках од народжіня єпархіална фаза
В день 110-ой рочніцї народжіня єпіскопа Павла Петра Ґойдіча, 17-го юла 1998-го року, в каплічцї єпіскопской резіденції в Пряшові офіціално одкрыла ся єпархіална фаза выголошіня за блаженого владыкы.
„Про роботы в тій кавзї быв призначеный постулатор, священик Ян Креглик, а так само были зряджены три комісії – юрідічна, історічна і теолоґічна. Комісія історічна концентровала ся і оцїнила вшыткы матеріалы, котры ся сохранили о особі владыкы Павла. Комісія теолоґів їх бадала з теолоґічного погляду, ці в них не є штось проти віры. Комісія юрідічна выслухала вшыткых свідків і їх выповідї записала подля правил канонічного права.“
Завершіня вшыткых намагань
Завершінём вшыткых тых намагань была торжественна беатіфікація в Римі 4-го новембра 2001-го року, коли Святїшый Отець Іоан Павел ІІ. выголосив єпіскопа Павла Петра Ґойдіча за блаженого, а вєдно з ним і єромонаха Методія Домініка Тырчку.
На беатіфікацію до Рима пришло коло 5 тісяч віруючіх із Словакії. Офіціалный проґрам пути зачав вже 3-го го новембра, коли в Базиліцї св. Клімента, де быв владыка Ґойдіч у 1927-ім роцї рукоположеный на єпіскопа, была одслужена літурґія.
По торжественній беатіфікації в тот самый день пополудне одслужена была літурґія в церьковнославяньскім языку в Базиліцї святой Праксевы. На другый день была одслужена далша дяковна літурґія в Базиліцї Санта Марія Маджоре, де были Папом Адріяном ІІ. у 868-ім роцї схвалены церьковнославяньскы літурґічны книгы.
Владыка Василь Гопко быв Іоаном Павлом ІІ. выголошеный за блаженого о нецїлы два рокы пізніше, 14-го септембра 2003-го року в Братіславі. Єпіскопа Теодора Ромжу тот самый Вселеньскый Архієрей выголосив за блаженого 27-го юна 2001-го року у Львові.
Петро МЕДВІДЬ, Лем.фм, ґрафічна і языкова управа: ред. АРК в СР.
