31. 7. 2023: СРР схвалила проґрам конґресу в Новім Садї
В Новім Садї одбуде ся XVII. Світовый конґрес Русинів.
В пятніцю, 28-го юла 2023-го року, проходило за порядком 8-ме засїданя Світовой рады Русинів, выконного орґану Світового конґресу Русинів в меджіконґресовім періодї. Засїданя проходило онлайн формов.
Рада мала на проґрамі засїданя веце пунктів. Якбач найважнїшым было схвалїня проґраму XVII. Світового конґресу Русинів, котрый буде проходити од 17-го до 19-го авґуста 2023-го року в главнім містї сербской Войводины – Новім Садї.
Проґрам роздїленый до трёх днїв
Проґрам про делеґатів і гостів XVII. Світового конґресу Русинів є роздїленый до трёх днїв. В рамках четверьга, першого дня, на участників чекать културный проґрам. Приготовлена буде выстава малярьскых творів Влада Няраді в ґалерії Кулутрного центра Войводины Мілош Цырнянскі.
В тот день одбуде ся і поетічна стрїча, в рамках котрой одпрезентують ся поеты і поеткы з членьскых держав СКР вєдно з домашнїма русиньскыма творцями поезії. Світову раду Русинів в тот день чекать і робочій проґрам, бо у вечурнїх годинах одбуде ся засїданя рады.
Передаваня премій і перше пленарне засїданя
Вже традічно головный проґрам конґресу буде роздїленый до двох днів, в рамках котрых одбудуть ся три пленарны засїданя.
Святочне одкрытя XVII. Світового конґресу Русинів одбуде ся в пятніцю, 18-го юла, в просторах Філозофічной факулты Універзіты в Новім Садї. На тот день є наплановане по святочных приговорах і выголошіня лавреатів Премії Василя Турока-Гетеша i Націоналной премії за русиньске уменя імени Івана Манайла Pro Arte Ruthenorum.
Пак вже буде конґрес продовжовати 1-ым пленарным засїданём, в рамках котрого будуть прочітаны справы о дїятельсві за рокы 2021 – 2023 од председы конґресу, представителів членьскых орґанізацій із окремых держав, як і од ревізійной комісії.
На пополудне першого робочого дня є наплановане засїданя ХI. Світового форуму русиньской молодежи, як і робота по окремых комісіях Світового конґресу Русинів.
У вечурнїх годинах участників чекать театралне преставлїня на русиньскім языку, а Світова рада Русинів буде в тот вечур мати своє друге конґресове засіданя. В тот день проґрам конґресу буде збогаченый і о Меджінародну научно-фахову конференцію під назвов Світова русиністіка днесь і в будучности.
Другый робочій день конґресу
В суботу, 19-го авґуста, одбуде ся другый робочій день XVII. Світового конґресу Русинів. Проґрам зачінать 2-ым пленарным засїданём.
В рамках нёго участны выслухають інформації о роботї од председів окремых конґресовых комісій, якы будуть інформовати о замірах і цїлях роботы на рокы 2023 – 2025. Рїшати ся пак будуть пропозіції на зміны в Шатутї Світового конґресу Русинів.
По перерві буде наслїдовати презентація кандідатів на членів у новім складї Світовой рады Русинів, і голосованя о новім складї, яке буде проходити en bloc. Далше буде проходити оголошіня і голосованя за новых членів Ревізійной комісії, што буде проходити єднакым поступом – довєдна.
Друге пленарне засїданя закінчіть ся презентаціёв кандідатів на председу Світового конґресу Русинів, котрый є єдночасно председом Світовой рады Русинів. По презентації є напланована перерва, почас котрой буде засїдати Світова рада Русинів першый раз у новім складї.
По перерві зачне 3-тє пленарне засїданя, в рамках котрого буде выберати ся голосованьом председа Ревізійной комісії, а так само новый председа Світового конґресу Русинів. Не менше важным пунктом буде приятя Резолуції XVII. Світового конґресу Русинів, за котру так само мусять голосвати участны делеґаты.
По тых важных пунктах делеґаты іщі потвердять місце засїданя XVIIІ. Світового конґресу Русинів, котре одбуде ся за далшы два рокы, чім ся офіціално закінчіть проґрам конґресу і участны підуть на далшый културный проґрам до центра войводиньскых Русинів – Руського Керестура.
Головным орґанізатором XVII. Світового конґресу Русинів є членьска орґанізація за Сербію – Руска матка, котрой головов є проф. Михайло Фейса.
Петро МЕДВІДЬ, ЛЕМ.фм, языкова і ґрафічна управа: АРК в СР.
