30. 8. 2020: Русиньскый фестівал і фолклорный конкурз в гуменьскім сканзенї

Фолклорный день приготовив Вігорлатьскый музей в Гуменнім в просторах свого сканзену на 5-го септембра 2020-го року. Суботнє пополідне буде належати аж двом подіям. Інформовала о тім Яна Федічова із Вігорлатьского музея.

Од 13.00 год. буде в Експозіції народной архітектуры і бываня проходити подія під назвов Грай, співай, танцюй… і по нї буде слїдовати од 15.00 год. 6-ый рочник Русиньского фолклорного фестівалу.

Грай, танцюй, співай…

Грай, танцюй, співай… є реґіоналным конкурзом музичного фолклору дорослых. Конкурз проходить в катеґоріях соло спів і дует.

Конкурзный репертоар участных в окремых катеґоріях буде выключно із фолклорного матеріалу области вышнёго Земпліна, значіть з окресів Гуменне, Снина, Меджілабірцї, припадно прилеглых областей реґіону в рамках Словакії.

Русиньскый фолклорный фестівал

Понад двасто фолклорістів з реґіону вышнёго Земпліна авізує Вігорлатьскый музей почас першой септембровой суботы в рамках 6-го рочника Русиньского фолклорного фестівалу. Розмаїтый музичный, співацькый і танечный проґрам зачне такой по реґіоналнім конкурзї.

„В дакількогодиновім проґрамі ся представлять запалены носителї і пропаґаторы културных традіцій реґіону, лавреаты многых фолклорных переглядок і конкурзів, членове містных фолклорных ґруп і солісты спомеджі дорослых і дїтячіх інтерпретів.“

В рамках фестівалу участны будуть годны відїти ансамблї Вігорлат Снина, Хемлон Гуменне, Хемлонячік Гуменне, ґрупы Гачуре і Босорочкы, солістів Людовіта Джубака, Михала Сійку, Ванду Марінчакову, Янку Маґурову і много далшых.

Фолклорный проґрам в гуменьскім сканзенї є вкладом Вігорлатьского музею ку підпорным актівностям ку Дню европской културной дїдовизны, котрый ся святкує 14-го септембра. Фестівал є орґанізованый вєдно із Русиньсков обродов на Словеньску.

Петро МЕДВІДЬ, ЛЕМ.фм, языкова управа: ред. AРК в СР.