30. 10. 2018: Studium Carpato-Ruthenorum 2019
Меджінародна лїтня школа русиньского языка і културы – 10. рoчник, Пряшівска універзіта, 9. – 29. 06. 2019
Пряшівска універзіта в Пряшові є єдинов універзітов у Словацькій републіцї, котра реалізує навчаня акредітованого бакаларьского, маґістерьского і докторьского штудійного проґраму русиньскый язык і література, ґестором котрого є Інштітут русиньского языка і културы. Вдяка ёго 3-тыжденному едукачному проєкту Studium Carpato-Ruthenorum – Мeджінародна лїтня школа русиньского языка і културы Пряшівска універзіта є сучасно єдинов універзітов на світї, котра зареаґовала на інтерес o таку форму навчаня русиньского языка з боку домашнїх і загранічных адептів і в сучасности рихтує десятый рoчник того меджінародного проєкту.
Меджінародна лїтня школа русиньского языка і културы є про:
- каждого, хто ся хоче учіти русиньскый язык і спознати історію і културу карпатьскых Русинів,
- штудентів середнїх і высокых школ,
- особы над 18 років.
Цїлём проєкту є здобыти або розшырити языковы компетенції в русиньскім літературнім языку і проглубити знаня з области карпаторусиньской історії, културы, літературы, етноґрафії.
Педаґоґічный процес
Педаґоґічный процес на лїтнїй школї проходить в просторах Пряшівской універзіты, ул. 17. новембра ч. 15. Навчаня ведуть высокошкольскы професоры, фундованы славісты і шпеціалісты в области карпаторусиністікы зо Словакії, Україны, США і Канады.
Педаґоґічный процес творить інтензівный курз русиньского языка (уровнї А, Б, Ц) і історії карпатьскых Русинів, і мінікурз етноґрафії карпатьскых Русинів.
В цїлім педаґоґічный процес обсягує:
20 годин русиньской історії в анґліцькім і русиньскім языку, т. є. 2 годины каждый день, од 09.00 дo 11.00 год.
30 годин русиньского языка в анґліцькім і русиньскім языку, т. є.
2 годины каждый день, од 14.00 дo 16.00 год. (теорія і конверзація),
10 годин етноґрафії Русинів в анґліцькім і русиньскім языку (подля приложеного проґраму),
годины конверзації в неформалных просторах, ґрупах і сітуаціях,
т. є. мімо універзітных клас (подля приложеного проґраму).
Абсолвенты здобудуть Цертіфікат о абсолвованю Studium Carpato-Ruthenorum 2019. Тоты штуденты, котры абсолвують мінімално дві третины годин із каждого предметa, здобудуть становлену кількость кредітів і Цертіфікат абсолвента Studium Carpato-Ruthenorum 2019.
Курз історії карпатьскых Русинів
Лекторы: Проф. Др. Павел Роберт Маґочій, Торонтьска універзіта, Канада
Доц. Др. Володимир Фенич, к. н., Ужгородьска народна універзіта, Україна
Курз є заміряный на історію Карпатьской Руси і карпатьскых Русинів од найстаршых часів аж по сучасность.
Курз русиньского языка
Лекторы: Асіст. Проф. Др. Елена Будовская, Джорджтавньска штатна універзіта), Вaшінґтон, D. С., США
ПгДр. Кветослава Копорова, ПгД., Пряшівска універзіта, Словакія
Мґр. Марек Ґай, екстерный сполупрацовник Інштітуту русиньского языка
і културы Пряшівской універзіты, Словакія
Курз є заміряный на здобытя і розшырїня языковых компетенцій в русиньскім літературнім языку. Має теоретічну і практічну часть. Теоретічна часть є заміряна на здобытя знань з области сістемной штруктуры русиньского языка. Цїлём практічной части є навчіти ся бісїдовати по русиньскы і писати. Курз буде розшыреный о годины конверзації в неформалных просторах, ґрупах і сітуаціях, т. є. мімо універзітных клас.
Мінікурз русиньской етноґрафії
Лекторы: Асоц. Проф. Др. Патріція А. Крафчік, Еверґріньска штатна універзіта, Олімпія, Вашінґтон, США
Мґр. Валерій Падяк, к. н., Пряшівска універзіта, Словакія
Мінікурз є заміряный на дакотры области етноґрафії карпатьскых Русинів: народны співанкы, музику, звыкы, традіції...
Супроводны акції
Інтеґралнов частёв лїтнёй школы є супроводный проґрам, котрый ся реалізує все в пообіднїх годинах і через вікенды. Є заміряный на:
презентацію русиньскых традіцій, фолклору і културно-сполоченьского жывота Русинів на Словеньску,
презентацію русиньской народной архітектуры і културы, културно-історічных памяток (музеї, сканзены, деревяны храмы),
літературный вечур,
выступлїня театру і філмовы вечоры,
творивы дїлнї (крашіня яєць, спів, танець),
екскурзії по Пряшові і ёго околіцї і до реґіонів северовыходной Словакії, де жыють Русины.
Уквартелёваня і стравованя
Участници лїтнёй школы будуть уквартелёваны в штандардных двойпостілёвых ізбах з припоїнём на інтернет высокошкольского інтернату на ул. 17. новембра ч. 11 в Пряшові, недалеко высокошкольского ареалу. Стравовати ся будуть в їдални высокошкольского інтернату на ул. 17. новембра ч. 13. Штуденты будуть мати к діспозіції сполочну інтернатну кухню з леднічков і прачков. Недалеко высокошкольского ареалу ся находять обходы з потравинами, дроґеріёв, рештавранты, інтернетовы кавярнї, книжковы обходы, кіоскы, апатыка, заставка автобуса.
Цїна і адміністратівный поплаток
Цїна за 3-тыжднёве перебываня на лїтнїй школї є становена на 1 200 €, респ. 1 670 USD. В цїнї є загорнутый педаґоґічный процес, уквартелёваня, стравованя (фрыштик, обід, вечеря), транспорт і выклад почас екскурзій, тікеты до музеїв, сканзенів, деревяных церьквей, театру.
Повинностёв будучіх штудентів лїтнёй школы є в становленім термінї заплатити адміністратівный поплаток (котрый ся не вертать) в сумі 100 €, респ. 120 USD.
Транспорт на лїтню школу, т. є. дорогу до Пряшова і назад, каждый участник собі платить сам.
Штуденты, котры планують абсолвовати цїлый проґрам лїтнёй школы, можуть пожадати од орґанізатора штіпендію.
Важны терміны
Приглашкы на Studium Carpato-Ruthenorum 2019 ся приїмають он-лайн найпізнїше до 1. апріля 2019 на адресї urjk@unipo.sk, респ. на поштовій адресї:
Prešovská univerzita
Ústav rusínskeho jazyka a kultúry
Ul. 17. novembra 15
080 01 Prešov
Slovenská republika
Адміністратівный поплаток (100 €, респ. 120 USD) треба заплатити найпізнїше до 15. апріля 2019.
Решту становленой сумы (т. є. 1 100 €, респ. 1 550 USD) треба заплатити найпізнїше до 15. мая 2019.
Потрібны контакты
Приглашку на Studium Carpato-Ruthenorum 2019 і комплетный проґрам найдете на http://www.unipo.sk/cjknm/hlavne-sekcie/urjk/ls/ 2019/; www.c-rrc.org.
Контактны особы про штудентів зо Словакії: Мґр. Тімеа Верешова, ПгД.,
тел. +421 915 412 917, і-мейл: timika1121@gmail.com;
Мґр. Аліца Вєтошевова, тел.: +421 (51) 756 31 89, +421 907 385 301,
і-мейл: urjk@unipo.sk.
Контактнa особa про загранічных штудентів: Асоц. Проф. Др. Патріція А. Крафчік,
ПЛАЧІНЯ
Заплатити мож:
а) банковый трансфером:
Назва рахунку (учту): Bežný účet Prešovská univerzita Prešov
Чісло рахунку: 7000066503/8180
BIC - SWIFT: SUBA SKBX
IBAN: SK15 8180 0000 0070 0006 6503
Назва банкы: Štátna pokladnica
Адреса банкы: Radlinského 32
810 05 Bratislava 15
Варіабілный сімбол: 1840
б) готовостёв по приходї до Пряшова 10. юна 2019.
Тїшыме ся на вас на Studium Carpato-Ruthenorum 2019 – 10. рoчнику Меджінародной лїтнёй школы русиньского языка і културы на Пряшівскій універзітї в Пряшові.
