3. 4. 2024: Мож онлайн чітати найновше выданя журналу Отцюзнина. Має уж і властный вебсайт

Отцюзнина уж і на соціалных сїтях.

В лїтї 2023-го року подарило ся з фінанчнов підпоров америцькых Русинів через професора Павла Роберта Маґочія обновити выдаваня єдиного друкованого русиньского періодіка на Підкарпатю – журналу Отцюзнина.

Выдавателям, котрыма суть Закарпатьске областне научно-културолоґічне общество імени Александра Духновіча і Русиньскый културолоґічный клуб, подарило ся в минувшім роцї выдати дві чісла журналу.

Уж початком фебруара того року обявило ся передплатникам в їх поштовых скринках перше тогорічне выданя Отцюзнины. Но ґрупа здїбных людей, котра ся зышла коло редакції, якой головов є Юрій Шиповіч, єдночасно глава Русиньского културолоґічного клубу, все робить на злїпшованю.

Од першого выданя обновленого журнала злїпшовала ся каждым далшым ґрафічна обробка, але і обсяг Отцюзнины. Теперь нашы підкарпатьскы Русины вырїшыли дістати журнал до шыршой знамости людей і посередництвом властного сайту а соціалных сїтей.

Єднов із пожадавок америцькых Русинів, котры підтримали выдаваня Отцюзнины на два рокы, было, жебы журнал быв доступный і в електронічній формі на інтернетї. Тоту пожадавку акцентовав і професор Маґочій на презентації першого обновленого выданя, котра одбыла ся на кінцю місяця юл 2023-го року.

Дочасным притулком став про Отцюзнину і наш сайт, кедьже наша медіална ґрупа підпорує Русинів на Підкарпатю, котры не мають жадной підпоры од своёй державы, а невеце є сітуація на Українї іщі складнїша вдяка войны. Зато сьме все по даякім часї од выданя публіковали на сайтї електронічну верзію журналу.

Теперь Отцюзнина зробила першы властны крокы у світї інтернету. У фебруарї быв створеный новый вебсайт журнала, де мож найти выбраны статї із друкованой верзії, а недавно прибыла там і повна електроніча верзія найновішого выданя, котру мож чітати.

Отцюзнина обявила ся і на соціалных сїтях. Покля хочете знати вшыткы новоты односно журнала, мож собі Отцюзнину найти і в рамках сїтей Facebook а Instagram.

Петро МЕДВІДЬ, ЛЕМ.фм, языкова і ґрафічна управа: АРК в СР.