3. 4. 2019: Буковскый: „Презідент державы бы ся веце мав занимати народностныма меншынами.‟
Од будучого презідента державы, котрым по другім колї презідентьскых волеб на Словакії, яке проходило 30-го марца 2019-го, стала Зузана Чапутова, очекує уповномоченый влады Словацькой републікы про народностны меншыны Ласло Буковскый (на фотцї), же ся буде веце занимати вопросами народностных меншын.
Інформовала о тім словацька пресаґентура SITA. Меншынова політіка подля слов Буковского належыть ку фундаментам демократічной сістемы.
Є потрібна комунікація з меншынами
„Меншынова політіка є фундаментом демократічной сістемы. Но ку досягненю того цїлю є потрібна реґуларна комунікація, але і фаховець в тімі презідента ці презіденткы, котрый бы сістематічно обертав увагу на потребы і проблемы народностных меншын,“ повів про аґентуру уповномоченый.
Буковскый підкреслив, же в минулости не зорґанізовала ся ани єдна стрїча презідента із уповномоченым про народностны меншыны. Окрім іншого, очекує, же у своїх приговорах і в справі о ставі републікы, котру чітать презідент перед парламентом, не забуде нова презідентка припоминати і народностны меншыны.
В кампанї ся меншыны рїшали аж перед другым колом
В кампанї, котра проходила перед першым колом, презідентьскы кандідати занимали ся різныма темами, но меншынам ся подля слов Буковского увага не давала.
„О потребах народностных меншын і етнічных ґруп нїч не зазвучало. Як кебы народностны меншыны не мали свої оправданы пожадавкы, подобно як іншы меншыны. Єм радый, же перед другым коло выборів сітуація змінила ся, обидвоми кандідаты підкреслили вклад народностных меншын про Словакію і обіцяли, же будуть веце інтересовати ся їх актуалныма проблемами,“ конштатовав уповномоченый.
Єдночасно вітать, же народностны меншыны, аж на дакотры выняткы, не были неґатівным елементом кампанї. „Такзвана мадярьска карта не грала жадну роль. Довгодобым цїлём є, жебы на членів народностных меншын не смотрило ся як на чуджінцїв, але як на рівноправных обчанів Словацькой републікы,“ повів Буковскый.
Чапутова подяковала в языках меншын
На Словакії суть узнаны тринадцять народностных меншын. Меджі штири найвекшы за остатнім сюисованём населїня, котре проходило у 2011-ім роцї, належать мадярьска, ромска, русиньска і чеська меншына.
Якраз в тых языках, окрім словацького, подяковала за голосованя на своїм першім бріфінґу по публікованю іщі неофіціалных резултатів в ночі зо суботы на недїлю новозволена презідентка Словацькой републікы Зузана Чапутова. Было то першый раз в історії Словакії, же новозволена глава державы дяковала і в языках мешнын. Єднако зробила і на своїм профілї на сітї Facebook по першім колї волеб.
Петро МЕДВІДЬ, лем.фм
