3. 10. 2018: Для Никыфора – пропамятна стріча в Креници

В рамках упамятнінь 50. річниці смерти Епифана Дровняка, якы сут орґанізуваны протягом текучого рока в Креници, в наступным тыжни, 9. жолтня/октобра 2018, пройде пропамятна стріча, на котрій припоминати будут особу выдатного артисты.

Як поінформувал Округовий Музей в Новым Санчы – одділіня Музею Никыфора в Креници, віторкова стріча присвячена буде упамятніню 50. річници смерти выдатного креницкого маляря, котру в тот ден своіма выступами прикрашат м.ін. сучасны лемківскы артисты.

В специяльным проґрамі пн. «Для Никыфора» спільний выступ дадут піснярка Юлия Дошна та бард Лемковины Петро Мурянка. В артистичным проґрамі окрем музыкы і співу не бракне рецитациі поезиі, яку роками поєдны творці писали в чест Никыфора. Того вечера выступит хор Роса з Устя Руского, якій в в великій мірі складат ся з лемківскых членів. Колектив выступит з лемківскым репертуаром.

Текучий рік сміло мож назвати роком Никыфора (1895-1968). Лемківскій артиста, за жытя недоцінений, днес являт ся єдным з найбільше розпознавальных Русинів з Лемковины во світі. 10. жолтня/октобра 2018 р. выпадат точно 50. річниця його смерти. Вмер в Фолюшы, а похоронений є на креницкым теметові.

Стріча пройде в бальовій Сали старого Здройового Дому о 17.00 год.

До 11. листопада/новембра 2018 р. мож іщы позерати на выставу «Никыфор маляр – Никыфор артиста», яка выставлювана єст в просторах Музею Никыфора.

Медияльна ґрупа ЛЕМ.фм тримат патронат над шором подій орґанізуваных Округовым Музейом в Креници і Містом Крениця.

Севериян КОСОВСКЫЙ, жрідло: лем.фм, фот. скрін YouTube; кадр з фільму «Мій Никыфор»

(Публікуєме в оріґіналї – лемківскім варіантї русиньского языка.)