3. 1. 2023: В літературнім конкурзї найлїпшый твор Мірослава Жолобаніча

В пятніцю, 30-го децембра 2022-го року, в просторах Інштітуту русиньского языка і културы Пряшівской універзіты в Пряшові одбыв ся семінар, на котрім были выголошены резултаты 9-го рочника Літературного конкурзу Марії Мальцовской.

Одборне журї, котру вів Михал Павліч і далшыма членами были Кветослава Копорова і Аліца Вєтошевова, тот рік оцїнёвала творы шестёх авторів. „Того року до конкурзу послало свої творы менше авторів, як то бывать по іншы рокы, але умелецька уровень вшыткых посланых творів ся підняла,“ інформовав председа пороты Павліч.

Што до жанрів, тот рік были загнаны поетічны і прозаічны творы, драматічный текст ся на конкурзї не обявив.

На третїм місцї тот рік скінчіла Марія Шмайдова з пригодами про найменшых під назвов Під диков грушков. Друге місце заняла Людмила Шандалова з творами в жанрї інтімной поезії. Найлїпшым твором загнаным до 9-го рочника Літературного конкурзу Марії Мальцовской стала гуморістічна проза Мірослава Жолобаніча з назвов Піняженка.

Міро Жолобаніч (1956 р.) молоды рокы пережыв у Пчолинім, Сниньского окресу. Ґімназію закінчів у Снинї, пак продовжовав штудії на Філозофічній факултї Універзіты Павла Йозефа Шафарика в Пряшові. Робив высокошкольского педаґоґа, але і педаґоґа про арештантів. Моментално є у выслуговій пензії. Жыє в Кошіцях.

Дотеперь му по русиньскы вышли три книжкы афорізмів доповненых карікатурами: Хто ся сміє, є одважный із 2017-го року, Хто ся сміє, є мудрый із 2018-го і книжка Хто ся сміє, є здравый, яка вышла в роцї 2019. В роцї 2021 му вышла книжка гуморістічной прозы з назвов Захранка. В роцї 2022 выдав книжку Дуплава верьба. Лавреатом Літературного конкурзу Марії Мальцовской уж быв у 2020-ім роцї.

Петро МЕДВІДЬ, ЛЕМ.фм. Ґрафічна і языкова коректура: АРК в СР.