29. 9. 2021: Проґрам Театру Александра Духновіча в Пряшові на місяць октобер 2021
Приносиме вам проґрам Театру Александра Духновіча в Пряшові на місяць октобер 2021-го року.
1-го октобра 2021
І мудріяш домудрує (Велика сцена, 19.00 год.,)
„З дурных людей не треба ся высмівати, треба выхосновати їх слабости.“ Ґлумов знать, як здобыти собі поставлїня. Днесь є важным досягнути го посередництвом тых справных людей. Ґротескова історія о хамтивости і компліментах, в котрій молодый Ґлумов рихтує ся карьєрно поступити з выбрушеным, богатым языком і софістікованыма бісїдами. По стопятьдесятёх роках є пєса Александра Николаєвіча Островского іщі все актуална і зображує днешнїй способ комунікації тых „найвысшых“, де тоты „малы“ знають то добрї выхосновати.
6-го октобра 2021
Детектор лжи (Велика сцена, 19.00 год.,)
Повісте собі, же о манжелстві знате вшытко? Досправды то так є? Або… може о манжелстві не знаме абсолутно ніч? І манжелство може быти єдна велика незнама… А притім прекрасна комедія! Находиме ся в обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має выяснити дїла, котры суть на першый погляд баналны. А пізнїше і фаталны. Бо уж по хвілі знайде ся меджі небом і землёв. Лїпше повіджено – посеред таємніць тридцятьрочного манжелского одношіня. Тадь хто бы ся сперав покушіню спознати ясну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых героїв, метать їх до неочекованых сітуацій. Но публіка ся барз файнї бавить! Та ці то в жывотї аж таке вітязтво? Дізнати ся о нашых близкых досправды вшытко? Тверду правду? Як скінчіть тота сеанса несподїванок? Подарить ся загасити тот ґротесковый пожар манжелскых боїв? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішнїй комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміці акторьской кооперації, іскривости словных несподїванок. Значіть! Театралный вечур повный доброй забавы, усміву, котрый вам з часу на час замерзне на ротї, сміху і радостного обчутя ся може зачати!
14-го октобра 2021
Ани мак (Велика сцена, 19.00 год.,)
Зуна, іншпірована геройков із роману Франтїшка Швантнера під назвов Невіста полонин, боює із стереотіпами одношіня чоловіка 21-го столїтя ку природї. Як змінили ся односины чоловіка і природы, і як овпливнила ґлобалізація наше (нелем) енвіроманталне оточіня? Вкаже му путь вонка із цїлый час прискорюючого ся і неутримательного колобігу? Лиця нам освітлює світло екрану і природа нам чезне перед очами. Забываме на то, же якраз она є нашов частёв. Ці конзум є правилна путь? Є профіт основнїшый як охрана нашой природы? Жывота? Мате обще час… жыти ту?
22-го октобра 2021
12 стілцїв (Велика сцена, 19.00 год., 1-ша премєра)
Рафінована карікатура совєтьской сістемы і людьского ненажранства ся злучує в історії Іпполіта Воройбанинова і великого комбінатора Остапа Бендера, котрых наганяня ся за покладом приведе до різных небезпечных і комічных сітуацій.
28-го октобра 2021
12 стілцїв (Велика сцена, 19.00 год., 2-га премєра)
Выступлїня ТАД мімо Пряшів
2-го октобра 2021
Зістали за дураків (Културный дім Суків, 17.00 год.)
Україньскый комедіоґраф Марко Лукич Кропивницькый представлює ся в Театрї Александра Духновіча далшов комедіёв. 12 дївок на оддаваня, но жаден жених, холем не на першый погляд. Богатый млинарь Кукса і ёго сусїд, коваль Дранко, суть безнадійны в гляданю богатого мужа про своє велике потомство, но не знають, же жены ся о себе знають постарати самы, і поміч од отцїв їм нияк не треба.
3-го октобра 2021
Зістали за дураків (Културный дім Орлов, 14.00 год.)
4-го октобра 2021
На ревізію (Містьскый културный центер Гуменне, 18.00 год.)
Остра сатірічна комедія о жывот і роботї сільского старосты і о тім, як рїшыв проблемы сільскых людей. В пєсї найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.
5-го октобра 2021
Детектор лжи (Дім културы Снина, 18.00 год.)
9-го октобра 2021
Зістали за дураків (Културный дім Розтокы, 14.00 год.)
10-го октобра 2021
Зістали за дураків (Културный дім Кружльова, 15.00 год.)
12-го октобра 2021
Пісковиско (Штудіо Словацького народного театру в Братїславі, 19.00 год.)
Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме одповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дїтми і в дтинстві дорослыма? Суть ВІН і ОНА іщі досправдовы, або то вже лем знакы у віртуалнім світї? Найлїпша пєса (гра) 21-го столїтя про двох акторів (грачів).
17-го октобра 2021
Зістали за дураків (Културный дім Нижня Полянка)
24-го октобра 2021
Зістали за дураків (Културный дім Колбівцї, 19.00 год.)
26-го октобра 2021
Пісковиско (Divadlo pod Palmovkou в Празї, 19.00 год.)
Обертаме вашу увагу, же проґрам може быти зміненый на основі епідемічных обставин і наряджінь.
Петро МЕДВІДЬ, ЛЕМ.фм, ґрафічна і языкова управа: ред. АРК в СР.
