29. 9. 2021: 60 років грекокатолицкой парохіі в Шпротаві

Парохію од самого початку твроят в більшости Лемкы, якы по переселінях через долшый час не могли молити ся в своім обряді.

3. жолтня/октобра 2021 р. в Шпротаві на Нижнім Шлеску, де прожывают переселены Лемкы, а днес уж в більшости іх потомны, одбудут ся торжества звязаны з 60. річницьом покликаня в тым понімецкым місті грекокатолицкой парохіі Преображыня Господнього.

Істория парохіі є стисло повязана з дольом переселнців з акциі Вісла. Ювілейны упамятніня будут проходити в найблизшу неділю, де пак по богослужыняx в місцевым храмі буде концерт Лемківского Ансамблю Пісні і Танця Кычера. Артистична част зачне ся о 15.00 год. в Шпротавскым Домі Культуры.

Шпротава, што єй звали Шпортавом

В 1947 р. в рамках акциі Вісла на обшыр шпротавского повіту было переселеных 1560 oсіб, якы были вывезены з Лемковины шестьома транспортами. Транспорты одходили зо стаций в Грибові і Новым Санчы. Днешні жытелі Шпротавы і поблизкых сел то потомны жытелів прим. Брунар ци Кривой.

Грекокатолицка парохія Преображыня Господнього в Шпротаві была ериґувана в 1961 р. Парохію од самого початку твроят в більшости Лемкы, якы по переселінях через долшый час не могли молити ся в своім обряді. Вєдно з выгнаньом перестали фактично діяти структуры Апостольской Адміністрациі Лемковины (офіцияльно послідній раз была споминана в Annuario Pontificio в 1990 р. як Apostolica Administratio pro Lemkis).

Першым парохом был о. Володимир Гайдукєвич, бывшый адміністратор Волівця, а пак до самого выгнаня парох в сусідній Кривій (ґорлицкій повіт). Шпротавска парохія входит актуально в склад вроцлавско-кошаліньской єпархіі Украіньской Грекокатолицкой Церкви в Польщы. З парохіі походит владыка Аркадий Трохановскій, од 2021 р. єпископ новопокликаной ольштыньско-ґданьской єпархіі.

Лемкы скоро зачали лемківщыти назву понімецкого містечка Шпротава, называючы го Шпортава. Доднес шпротавскій повіт, якій входит в склад любушского воєвідства є єдным з найбільшых осередків прожываня лемківской меншыны в Польщы.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)