29. 5. 2020: Studium Carpatho-Ruthenorum 2020 не буде

В часї пандемії, коли окремы державы прияли різны крокы і рештрікції, жебы забранити пошырёваню нового тіпу коронавірусу, многы події, на котры сьме звыкнены в русиньскім середовиску, не мож реалізовати.

Зрушена вже дефінітівно была Русиньска ватра на Малім Липнику, Русиньскый фестівал у Свіднику натеперь зістав переложеный на септембер. Далше дефінітівне рїшіня зробило ся в повязаню із Studium Carpatho-Ruthenorum 2020 – Межінароднов літнёв школов русиньского языка і културы, котра мала тот рік мати вже свій 11-ый рочник.

Універзіта є заперта

Як інформовала нашу редакцію Анна Плішкова, директора Інштітуту русиньского языка і културы Пряшівской універзіты в Пряшові, зрушіня є повязане з цїлосвітовов сітуаціёв, кедьже на лїтню школу все приходили штуденты і зо Севереной Америкы, но і далшых країн світа, а єдночасно і з тым, же Пряшівска універзіта є од зачатку пандемічной сітуації заперта про штудентів, вступ до нёй теперь мають лем робітници той інштітуції.

Лїтня школа Sudium Carpatho-Ruthenorum 2020 мала проходити од 7-го до 27-го юла. „Хочеме подяковати вшыткым приголошеным штудентам за їх інтерес о проєкт і высловити надію, же в будучности обєктівна сітуація нам доволить продовжовати в реалізації проєкту і прияти домашнїх і загранічных штудентів, котры мають інтерес учіти ся русиньскый язык, історію і етноґрафію карпатьскых Русинів,“ інформовала Плішкова.

Studium Carpatho-Ruthenorum

Тритыжднёвый едукачный проєкт, котрый на Пряшівскій універзітї в Пряшові реалізує Інштітут русиньского языка і културы під назвов Studium Carpatho-Ruthenorum, є заміряный на навчаня русиньского языка, історії, літературы, културы і етноґрафії карпатьскых Русинів.

Лекції з тых дісціплін паралелно забезпечують ся в русиньскім і анґліцькім языку посередництвом загранічных і домашніх высокошкольскых педаґоґів.

В рамках лїтнёй школы є про участників каждый рік традічно приготовленый і богатый супроводный проґрам. До нёго належать навщівы културных подій, інштітуцій, ці екскурзії в реґіоні северовыходной Словакії, но штуденты зайдуть і на Лемковину.

За десять років існованя лїтнёй школы єй абсолвовало понад 210 штудентів з різных держав світа. Є то єдина русиньска лїтня школа свого тіпу на світї.

Здрой: Петро МЕДВІДЬ, ЛЕМ.фм