29. 3. 2023: В Пряшові одбыла ся бісїда о Духновічови

В понедїлёк, 27-го марца 2023-го року, Мала сцена Театру Александра Духновіча в Пряшові привітала участників першой публічной бісїды, серію котрых вырїшыв орґанізовати Округлый стіл Русинів Словакії вєдно з радіом русин ФМ.

Темов бісїды быв найвекшый русиньскый будитель, по котрім має назву і наш русиньскый театер, і котрого 220 років од народжіня припомянеме собі в апрілю того року.

Модератор події, єдночано педаґоґ і редактор русин ФМ Ладислав Ясик привітав двох діскутуючіх. На тему під назвов Жывот Александра Духновіча діскутовали доц. Валерій Падяк, к. н., робітник Інштітуту русиньского языка і културы Пряшівской універзіты в Пряшові, і ґрекокатолицькый священик Мілан Ясик, член Общества святого Йоана Крестителя.

Декламаціёв стихів Духновіча подію збогатив член драматічного колектіву нашого театру Володимір Рогач.

Бісїда была подїлена на штири тематічны блокы. Участны могли веце дізнати ся о жывотї будителя, о Духновічови як священикови, писателёви ці народнім будителёви. В бісїдї ясно вказало ся на факт, якый величезный вплив мав Духновіч на то, же Русины найшли ся меджі самобытныма, еманціпованыма народами.

Діскутуючі дотулили ся і темы, што є властно заповідёв Духновіча, і як є про русиньскый народ тота заповідь актуална доднесь.

Бісїда на тему Жывот Александра Духновіча была першов із серії, котру вырїшыв орґанізовати Округлый стіл Русинів Словакії, тот раз під покровительством своёй історічной комісії. З бісїды робив ся авдіо і відео запис, зато по технічнім оброблїню буде мож єй выслухати в ефірї радія русин ФМ, але так само буде доступна в службі Youtube, на каналї Округлого стола Русинів Словакії.

Русиньска платформа вырїшыла робити такый формат, жебы позітівнов медіалнов кампанёв пошырёвати правдивы інфромації о Русинах, їх історії, як посеред Русинів, так і меджі маёрітным жытельством, ці меджі іншыма народностями, кедьже цїлодержавны медії часто не інформують о Русинах правилно.

Петро МЕДВІДЬ, ЛЕМ. фм, языкова і ґрафічна управа: АРК в СР.