29. 3. 2022: Матуш Кімак оцїненый селом Земпліньскы Гамры

Од лїта 2020-го року штудент Гуменьской державной ґімназії Матуш Кімак (на фото влїво) творить відеа о земпліньскых містах і селах. Актуално є їх на ёго каналї в службі Youtube доступных коло 130.

Велё з них представлює якраз русиньскы села. Відеа Матуша Кімака нашли свою публіку на Словакії, але і за граніцями. Село Земпліньскы Гамры, котрым закончів мапованя Сниньсого окресу, оцїнило Матуша Кімака за ёго пропаґачну роботу памятнов плакетов.

„Відеа суть про вшыткых, котры в даный момент не годны іти на тоты місця,“ повів Кімак. Перше відео выникло почас вакацій у родины у Воронові над Топлёв. По відеу з Гуменного зачав робити далшы села околіцї, а кедьже є сам Русином, далшый быв окрес Меджілабірцї.

Спочатку лем мобіл і біціґель

За рік і пів змаповав у своїх відеах вшыткы села в окресах Меджілабірцї і Снина, часть окресів Гуменне, Воронів над Топлёв і Собранцї.

Спочатку точів Кімак відеа лем на мобілный телефон і з біціґля. Пак їх зачав робити з авта з професіоналной камеров, і посредництвом дрону. Першы відеа мають лем дакілько минут, пізнїшы творы і до пів годины. Гуменьскый штудент в них представлює села з ґеоґрафічного і історічного боку, звертать увагу на інтересности і памяткы. Темы до відеа глядать і у старостів.

Найвеце позерають ёго відеа коло Меджілаборець, із сел найвеце ословили інтернетову публіку Убля, Уліч ці Светліцї. „То ня несподівало, бо то село, котре має коло 100 жытелїв. Но правдов є, же много людей одтыль одшыло,“ повів Кімак з тым, же то якраз русиньскы села, з котрых жытелї у великій кількости в минулости еміґровали, на якы діставать многы реакції із заграніча.

Оцїненый за пропаґацію

Кімакова робота собі подля старосты Земліньскых Гамрів Яна Кепіча (на фото справа) заслужыть нелем похвалу. „То дашто, чім многы занимаме ся на многых форумах, як наштартовати турістічный рух в тім реґіонї, як го спропаґовати. А він, посередництвом свого канала, то рїшыть і пропаґує, навеце безплатно,“ пояснив Кепіч, чом сільске заступительство вырїшыло оцїнити Кімаковы актівности.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.