29. 3. 2020: За послїднїх 24 годин на Підкарпатя із заграніча вернуло ся 945 краянів, став ку 27-го марцу 2020-го року
О кількости Підкарпатцїв, котры вернули ся із заграніча за послїднїй тыждень на бріфінґу інформовав першый заступник головы Закарпатьской областной державной адміністрації (ОДА) Олексій Гетманенко, пише Mukachevo.net.
Подля Гетманенка од 18-го до 26-го марца 2020-го року із заграніча вернуло ся 7 674 містных жытелїв, з котрых 41 людей путовало з Італії.
На Українї, став рано 28-го марца, зареґістровали 311 припадів коронавірусовой хвороты. Вакціна проти Covid-19 не екзістує. На даный час найвеце ефектівныма способами охраны од вірусу є обмеджіня рушаня (у рамках міста, области, реґіону, державы і меджінародного) і запроваджіня карентены.
Припоминаме, же про енормне пошырёваня коронавірусу на Українї запровадили режім надзвычайной сітуації. Володимір Зеленьскый оголосив обмеджіня пасажірьского руху через граніцїі в обидва бокы од кінця дня 27-го марца. В предвечур, як заперали ся граніцї, на закарпатьскых гранічных переходах вытворили ся довгы колоны.
На Підкарпатю закрыли часть перевалів, котры ведуть до области. На чотирёх перевалах при вяздї до Закарпатьской области, конкретно Ужоцькый, Торуньскый, Яблунецькый і Абраньскый, были даны барьєры. На двох послїднїх перевалах будуть контролно-переходны пункты, де буде ся робити контрола обчанів, котры входять до области. Єднов із процедур буде контрола теплоты, підкреслив Гетманенко.
Коронавірус на Підкарпатю
У лабораторії Мінітерства охраны здоровля в Києві подтвердили Covid-19 у жены з Мукачова, котрій діаґностіковали коронавірус 24-го марца, інформує Закарпатьска ОДА. За даныма, їй муж вернув ся з Італії 6-го марца. В сучасности їй став стабілный, лїчіть ся у Закарпатьскім областнім інфекційнім шпыталю. Мукачовска містька рада інфомровала, же ідетіфіковала вшыткы особы, котры могли контактовати ся з інфікованов женов.
Мукачовцї не доторимують карантенный режім
Мукачово вже майже два тыжднї жыє у режімі карантены. Пусты уліцї і заперты обходы: ці змінило ся місто, і ці вшыткы дотримують самоізолацію перевірила корешпондентка порталу lem.fm.
Перепозераючі фоткы на соціалных сітях як вызерають підкарпатьскы міста в періоді карантены, мож зробити резултат, же жывот в містах має „павзу“. Но кедь ся перейдете уліцями Мукачова, надіяти ся на полїпшіня епідеміолоґічной сітуації не мож. Люде продовжують ціркуловати як у обычаный день. Дотримованя карантенных правил у Мукачові очекує веце. В тот час, коли векшына україньскых міст демонштрує уліцї без людей, Мукачовцї нияк рітм жывота не мінили.
Наперек інфомрованю і аґітації дома зіставають далеко не вшыткы. У не великім Мукачові (86 339 жытелів став у 2016-ім роцї, позн. ред.) творять ся шоры за потравинами, і то 20 аж 30 людей, котры не дотримують діштанцію. Можеме там і днесь стрїтити людей без средств охраны. А суть то люде середнёй і старшой віковой катеґорій, часто якраз они і роблять в контактї з людми.
Торг на свіжім воздусї
Єден з найбівшых торгів Закарпаття „ГІД“ не заперають про карантену. Торг „ГІД“ фунґує не позераючі ся на опатріня, котры были акцептованы по цїлій Українї. Подля представителїв компанії ТОВ тот торг є на свіжім воздусї, і то кардінално одрізнять ся од запертого простору в остатнїх обходах.
Одповідї людей на коментарь з боку корешпондента о небезпечности коронавірусу
Шофер таксі, 47 р.: „Я не вірю, же даякый коронавірус єствує, то придумали таку шоу богаты, абы ся над нами простыма людми посміховати.“ Стражця обходу, 52 р.: „А нашто менї маска? Я не кусаю! Рукы мыю, рот полокам.“ Продавачка на торзї „ГІД“, 45 р.: „А што вы ся мене просите такы глупы вопросы? Вы думаєте у мене є час думати над такыма дурніцями. Я ся в ночі помолила, а там як Бог дасть.“ Шофер містьского транспорту, 60 р. : „Чоловіку днесь ани копійку не дають заробити! І што мі теперь робити без роботы? Попридумують там вшелиякого, а нам людям што пак робити?“
Карін МУЛЯР, ЛЕМ.фм
