29. 2. 2024: Одбыла ся вырочна громада орґанізації Руска матка

Як інформує аґентура Рутенпрес, 24-го фебруара 2024-го року одбыла ся вырочна громада орґанізації Руска матка, котра є членьсков орґанізаційов Світового конґресу Русинів за Сербію. Засїданя проходило в просторах орґанізації в Руськім Керестурї.

Вырочну громаду вів председа Руской маткы Михайло Фейса і робоча презідія, а на засїданю обговорили ся оцїнкы за минувшый рік, як і планы на тот рік. Участны были і председове містных орґанізацій з Коцура, Кулы, Вербасу, Городьского і Нового Саду, як і реґіоналной орґанізації в Сримі.

Як выходить з вырочной справы о фінанціях, Руска матка посередництвом проєктів і фінанцованя з інштітуцій забезпечіла на минувшый рік понад 1,2 міліона дінарів (понад 10 тісяч евр), з чого орґанізація фінанцовала много актівностей, а найвеце грошей выжадало собі орґанізованя 17-го Світового конґресу Русинів, котрый проходив в днях 17-го аж 19-го авґуста 2023-го року в Новім Саді.

Якраз Світовому конґресу Русинів, котрого орґанізатором была Руска матка, дав ся найвекшый акцент у окремых оцїнюючіх справах. На вырочній громадї далше бісїдовало ся і о выдавательскій роботї.

В рамках планів на тот рік было повіджено, же попри реґуларных културных подіях, котры суть вже традічны, Руска матка хоче обновити філмовый фестівал у Шідї, але так само хоче орґанізація намагати ся створити і многы далшы актівности, а рушати з вырїшованём актуалных потреб і проблем Русинів у Сербії.

На громадї было так само представлене найновіше выданя часопису Глашнїк РМ Руснак, котрый є офіціалным пресовым орґаном орґанізації. В рамках засїданя были так само призначены новы особы на функції секретаря і председы одбору про освіту.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Рутенпрес.