29. 10. 2017: 60-річный юбілей науковця Михаіла Капраля
25-го октобра 2017-го року дожыв ся округлого юбілею – 60-ох років, проф. Др. Михаіл Капраль, к. н., вызначный русиньскый высокошокольскый педаґоґ, філолоґ і журналіста, науковець. Народженый на Волинї, выростав на Підкарпатю, но коріня має на Пряшівскій Руси – в Остурнї, одкыль переселили ся ёго родічі почас тзв. оптацій. Днесь жыючій в Мадярьску.
Народив ся Михаіл Капраль в селї Новины, втогды Совєтьска Україна, 25-го октобра 1957-го року. В роцї 1966 переселила ся родина Капралёвых до Закарпатьской области Україны. В Ужгородї в роцї 1976 закінчів середню школу. В роках 1980 аж 1983 штудовав на Ужгородьскій державній універзітї, в роках 1983 аж 1986 штудовав на Ленінґрадьскій універзітї на Факултї журналістікы. У 1996-ім роцї здобыв Михаіл Капраль тітул кандідата наук на Київскій державній універзітї Тараса Шевченка.
Капраль в роках 1986 – 1997 учів російскый язык на універзітї в Ужгородї, пізнїше учів як доцент Катедры україньской і русиньской філолоґій Высшой педаґоґічной школы в Нїредьгазї в Мадярьску (од р. 2000 Нїредьгазька высша школа). Потім, што в роцї 2014 была катедра, яку основав Іштван Удварій, зрушена, Михаіл Капраль іщі веце раз різным способом пробовавав обновити в даякій формі русиньску філолоґію в Мадярьску.
Окрем педаґоґічного діяльства Михаіл Капраль занимать ся і баданём русиньской пресы і бібліоґрафії Підкарпатьского общества наук, котре існовало в роках 1941 аж 1944, міджі ёго науковы інтересы належыть і творчость Антонія Годинкы, вызначного русиньского науковця. Так само занимать ся языкознательством, заміряным главно на мадярьску варіанту русиньского языка, окреме в справі лексіколоґії і лексікоґрафії.
Капраль є плодным автором різных науковых і популарно-науковых робот. Почас свого наукового діяльства написав стовкы одборных статей, котры вышли в різных міджінародных зборниках, русиньскых і нерусиньскых часописах і новинках. Так само є автором або співавтором (найчастїше із Іштваном Удваріом) дакілько учебників і словарїв, котры вышли в Мадярьску, едітовав дакілько збірників. Тяжко із довго списку публікацій, під котрыма є Михаіл Карпаль підписаный, выбрати найглавнїшы, но мож спомянути холем дакотры.
Михаіл Капраль є єдітором штирєх томів публікації під назвов „Русинськый дайджест‟. Окремы книжкы під назвами Наука, „Красноє писемство‟, „Кроника 1. і 2.‟, суть выбером текстів публікованых в підкарпатьскых новинках: „Карпатска НедѢля‟, „НедѢля‟ ці „Нова НедѢля‟. Ку вшыткыым томам Капраль написав спередслово. „Час гурше ги вода…‟ то цїнна книжка, в котрій Капряль позберав, упорядковав і зробив коментарї ку русиньскым текстам Антонія Годинкы. Покля ся посмотриме на чісто наукову роботу, пак не мож не спомянути, же є автором проєкту під назвов „Словник села Великі Лази Ужгородського району Закарпатської області‟. Лем недавно му вышов із друку „Русинськый ортоґрафічный словарь (з ґраматичныма таблами)‟, котрый має быти єднов із основ кодіфікації мадярьской варіанты русинського языка.
У 2006 роцї Цїлодержавна русиньска самосправа в Мадярьску оцїнила Михаіла Капраля Преміов Антонія Годинкы. У 2013-ім роцї му была удїлена як лавреатови незалежна літературна „Русская премия‟. Капраль стабілно бере участь на Світовых конґресах Русинів і на Міджінародных конґресах русиньского языка. Так само є часто запрошеный на різны науковы конференції.
Петро МЕДВІДЬ
