29. 1. 2022: Споминаме на русиньского вытварного умелця АНДРІЯ ҐАЯ, котрый бы ся днесь дожыв 90 років

29-го януара 2022 минуло 90 років од народжіня русиньского маляря, ілустратора і педаґоґа вытварного уменя Андрія Ґая. Векшыну свого творчого жывота пережыв родак із Сукова в Пряшові.

Народив ся Андрій Ґай у Сукові, в окресї Гуменне, 29-го януара 1932-го року. Закінчів руську ґімназію в Гуменнім і далше штудовав у рр. 1952 – 1958 на Высокій школї вытварных умень в Братїславі. По абсолвованю высокой школы зачав робити в Пряшові як вытварный редактор україньского часопису Дружно вперед. В рр. 1960 – 1973 робив на Педаґоґічнім інштітутї і Катедрї вытварной выховы Педаґоґічной факулты у Пряшові Універзіты Павла Йозефа Шафарика в Кошіцях.

Од 1973-го року быв свободным умелцём. Курто учів і на Народній школї уменя і знова і на Катедрї вытварной выховы. Малёвав главно пейзажі, портреты, фіґуралны композіції, закутя країны. В періодї років 1960 – 1990 вытворив множество монументално-декоратівных творів у архітектурї, малеб на стїну, камянных і керамічных мозаік.

Андрій Ґай мав веце як 50 персоналных выставок і взяв участь на коло 150 колектівных выставках. У 1987 роцї здобыв медайлу За розвиток окресу Пряшів. В тім самім роцї му была передана в Кошіцях Премія крайского народного выбору за камянну мозаіку. З нагоды ёго 80-ой рочніцї у 2012-ім роцї была му передана Цїна пріматора міста Пряшів за довгорічный і вынятковый вклад у области вытварного уменя і репрезентацію міста дома і за граніцями.

Наперед Андрій Ґай выставлёвав дома і за граніцями як словацькый або україньскый умелець, по 1989-ім роцї припоїв ся до ку далшым пряшівскым умелцям на выставках русиньского уменя.

Андрій Ґай умер 15-го фебруара 2016-го р. в Пряшові. Мав 84 років.

П. М.