29. 1. 2020: Одбыв ся далшый річник Походу вдякы Дукля – Чертіжне

Памятку павшых у Другій світовій войнї і тот рік припомянули собі в селї Чертіжне, Меджілаборецького окресу, турістічно-ліжарьсков акціёв під назвов Поход вдякы.

На 27-ім річнику події, котрый одбыв ся в суботу, 25-го януара 2020-го року, брало участь приблизно сто участників. Про словацьку пресаґентуру TASR то потвердив староста Чертіжного Петро Трічак. Наймолодшым участником быв за словами старосты 11-річный хлопець, найстаршым 75-річный пан.

Подля Трічака ся подія за остатнї рокы стала атрактівнов і про турістів зо шыршой околіцї. Тот рік на поход пришли, окрем домашнїх, і люде з Левочі, Пряшова, Кошыць і Чеськой републікы.

Траса Походу вдякы зачінать коло Памятника чехословацького армадного корпусу на Дуклї, де собі участны припоминають павшых вояків положінём вінця, далше веде турістічнов стежков по словацько-польскій граніцї. З Чертіжняньского сідла продовжують участны до села на ліжах. Ціла траса має приблизно 15 кілометрів.

Село Чертіжне в сполупрацї зо Шпортовым клубом Кычара подію выголошує на послїдню януарову або першу фебруарову суботу, што залежыть од погоды. Но як староста про аґентуру повів, абсолвованя туры собі намагу выжадать за каждой погоды. Додав, же своёв намагов давають почливость павшым у Другій світовій войнї.

Петро МЕДВІДЬ, ЛЕМ.фм