28. 9. 2018: Церьковна незалежость

Обертам увагу, же україньскы власти бы ся односно проблемы церьковной незалежности мали обернути нелем на Константінополь, кедь уж зачали, але і до Серьбского патріархата. Тот мав юрідікцію і над Русинами на Підкарпатю.

Так само стоїть вопрос, ці кедь днесь, на основі слов єдного із константінопольскых єрархів, многы тримуть ся того, же Московскый патріархат має власти над україньскыма православныма лем завдякы комуністів і так властно не має што мати власти, усвідомлюють собі тоты самы люди, же над Підкарпатём має Києв власти так само лем завдякы комуністів. Але іншак мі то єдно. Я ґрекокатолик, значіть, лем ся публічно звідам.

Бо мі жаль, же Русины ниґда нич не розбивали, ани Україну. Голосовали за автономію (несповнену) в рамках Україны. А вдяка є така, же ани узнаны не сьме на Українї, а далше українізованы манерами навченыма од комуністів.

Петро МЕДВІДЬ