28. 8. 2023: З каштеля в Зборові буде музей

Реконштруовали в рамках проєкту Забыта країна Лемків і Руснаків.

Каштель Шередія із 16-го столїтя в Зборові, Бардеёвского окресу, перешов почас попереднёго року і пів компллетнов реконштрукціёв.

Выновленый ренесанчный каштель в центрї села буде служыти як музей, а так само на културны події. Подля старосты села Яна Шуркалы обєкт рокы служыв Маковіцькому панству як резіденчный а пізнїше адміністратівный центер.

Музей і културный обєкт

„Пізнїше ту была справа  штатных лїсів. Были ту і служобны квартелї про лїсных робітників. У 1969-ім роцї обєкт выгорів і одвтогды властно упадав. Од 2014-го року, кедь сьме дістали каштель до маєтку, подарило ся нам го поступно реконштруовати. Реконштрукція завершыла ся в тім роцї, кедь сьме з европскых фондів в рамках черезгранічной сполупраці Interreg V-A Польща-Словакія 2014 – 2020 здобыли і проінвестовали скоро міліон евр,“ повів про аґентуру TASR Шуркала.

В спіднїй части каштеля буде векша сала з кухнёв, як і вступна містность про турістів. „На першім штоцї буде музейна експозіція. В підкровю, шпеціфічный просторах, буде ґалерійный простор. Цїлый обєкт буде схоснованый, окрем пивніцї, котру сьме теперь в рамках реконштруцкії не рїшыли, але плануєме до будучности,“ інформовав староста Зборова.

Першу сезону зачнуть в слїдуючім роцї

Село на фінанцованю реконштрукції каштеля брало участь пятёма процентами. Вєдно з далшыма інвестіціями то подля старосты є проблизно 100 000 евр. Каштель реконштруовали поступно, у 2017-ім роцї была зроблена стрїха.

Сучасна реконштрукція была реалізована в рамках черегранічного проєкту Забыта країна Лемків і Руснаків у сполувраці із селом Кружлёв і Ґмінов Устя Ґорлицьке.

„Ідея є така, же ся поставлять три експозіції єдного музея, котрый буде черезгранічно служыти про турістів із Словакії, Польщі і, самособов, про чуджінцїв,“ повів Шуркала і доповнив, же в каштелю будуть выставльовати і выкопаны предметы із Зборовского замку.

„Буде презентована і історія той будовы в рамак родів, котры ту дїяли. Буде ту народописна експозіція, заміряна на підданство, котре ту жыло. В послїднїй части буде експозіція заміряна на то, з чого жыли люде в тім краю. В нашім припадї то переважно лїсницьтво, роботы з деревом, склярьство і так далше.“

В каштелю теперь зарядять інтерьєр і плануть го отворити кінцём року. Першу сезону про навщівників спустять правдоподобно в маю слїдуючого року.

Петро МЕДВІДЬ, ЛЕМ.фм, языкова і ґрафічна управа: АРК в СР.