28. 6. 2022: Стрічом в Варшаві зачал ся цикль промуючый польскє выданя книжкы проф. Маґочія

Саля Етноґрафічного Музею в Варшаві была выполнена.

Заповіданый од долшого часу цикль стріч з проф. Павлом Робертом Маґочійом мал свій початок в Державным Етноґрафічным Музею в Варшаві 27. червця/юнія 2022 р. При полній сали люди стрічу вели Адам Бальцер, шеф Центра Східньоевропейскых Студий Варшавского Університету (поль. Studium Europy Wschodniej Uniwersytetu Warszawskiego) і др габ. Томаш Стрыєк, проф. Collegium Civitas.

Причынком до стрічы было недавне выданя ряшівскым выдавництвом Лібра.ПЛ книжкы торонтского науковця в перекладі на польскій язык «Pod osłoną gór. Dzieje Rusi Karpackiej i Karpatorusinów». То бодай перша моноґрафія, в якій находиме історию Карпатской Руси і жыючого там населіня – карпатскых Русинів, дана чытачам в так приступный спосіб.

На місци, при вході на салю, де одбывала ся стріча, мож было купити книжку і – што для вельох колекцийонерів важне – достати автоґраф і дедикацию од автора. Охочых было вельо, а саля помалы заполняла ся людми.

Зачало ся од представліня особы проф. Маґочія і його наукового доробку. Дослідник, якій на Торонтскым Університеті веде Катедру Украіністикы ім. Джона Яремкы, а од 1996 рока являт ся реальным членом Канадийского Королівского Товариства, може ся похвалити авторством понад 900 публикаций, посеред котрых єст понад 40 книжок. В рамках своіх науковых специялизаций, котры сігают такых области як істория, картоґрафія, социйолінґвістика і ін., проф. П. Р. Маґочій находит вельо прац, якы прямо тыкают давной і близшой істориі Русинів обох сторін Карпат і діаспоры.

Варшавска стріча была першом, яка промує выданя книжкы «Pod osłoną gór. Dzieje Rusi Karpackiej i Karpatorusinów». Хто не встиг до Варшавы, має іщы шансу быти в краківскій Польскій Академіі Знань. Бесіду з проф. Маґочійом проведут там др габ. Олена Дуць-Файфер, проф. ЯУ та др габ. Анджей Зємба (28. червця/юнія, о год. 17.30). На дальшу – в середу, 29. червця/юнія, о 18.00 год. – просит до своіх просторів Музей Дворы Карвациянів і Ґладышів в Ґорлицях. Стрічу вюл буде др габ. Ян Пісуліньскій, проф. РУ. Дві послідні стрічы пройдут в Саноку в Історичным Музею 30. червця/юнія о 17.00 год. і в Музею Лемківской Культуры в Зындрановій – 3. липця/юлия о 15.00 год.

 

Демко ТРОХАНОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)