28. 5. 2020: Уповномоченый про народностны меншыны стрíтив ся з членами словацькой влады

Хоць од марца має Словакія новый владный кабінет, котрый веде премєр Іґор Матовіч, влада натеперь не рїшыла даяков змінов вопрос уповномоченого про народностны меншыны, і у тій функції зістав Ласло Буковскый (на фотцї), якый быв номінованый іщі по парламентных вольбах у 2016-ім роцї.

Уповномоченый і далше наповно выконує свою функцію, о чім свідчіть і то, же в остатнїх днях абсолвовав робочі стрїчі з членами влады Словацькой републікы, як інформовав ёго офіціалный сайт.

Стріча з міністерков справедливости

Буковскый ся в тыжднї од 18-го до 24-го мая 2020-го року стрїтив такой з двома міністерками. Зачатком тыждня обговорив проблематіку з міністерков справедливости Маріёв Коликовов.

„Головнов темов робочой стрїчі была далша взаємна сполупраца, котра бы мала надвязати на попереднїй період, і далшый поступ приготовлїня закона о народностных меншынах в смыслї Проґрамового выголошіня влады Словацькой републікы,“ інформовав сайт уповномоченого.

Влада Іґора Матовіча ся завязала прияти споминаный закон. Шеф резорту справедливости є навеце все і председом Рады влады Словацькой републікы про людьскы права, народностны меншыны і родову рівность, котрой порадным орґаном є Выбор про народностны меншыны і етнічны ґрупы, якомый зясь веде уповномоченый про меншыны.

Їднаня в конштруктівнім дусї

В пятніцю, 22-го мая 2020, уповномоченый в просторах міністерства стрїтив ся з міністерков културы Наталіёв Мілановов. Обидві стороны мали почас їднаня підкреслити важну роль обидвох інштітуцій при охранї і розвитку културы і ідентічности народностных меншын на Словакії.

Договорили ся, же уповномоченый і ёго уряд будуть актівно брати участь на окремых конкретных задачах, котры выходять із Проґрамового выголошіня влады Словацькой републікы. Буковскый на робочій стрїчі, окрем іншого, підкреслив і важность єствованя Фонду на підпору културы народностных меншын, народностных музеїв, як і планованый розвиток народностного высыланя у верейноправнім телерадію RTVS.

При конштруктівнім їднаню ся так само одкрыв і вопрос браня до увагы коекзістенції державного языка і меншыновых языків при їх вжываню.

„Я радый, же маю за собов першы їднаня, котры ся вели в конштруктівнім дусї. В близкій будучности суть напланован далшы стрїчі з членами влады Словацькой републікы, котры в меншыновій політіцї грають ключову роль,“ повів Буковскый по своїх першых їднанях з новыма членами влады.

Здрой: Петро МЕДВІДЬ, ЛЕМ.фм