28. 3. 2024: Русиньскый Вышнїй Комарник навщівили майже вшыткы повойновы презіденты

В суботу, 23-го марца 2024-го року, на Словакії проходило перше коло презідентьскых волеб. В повязаню з тым пресова аґентура TASR принесла статю, в котрій ся пише, же русиньске село Вышнїй Комарник, в окресї Свідник, навщівили майже вшыткы презіденты од закінчіня Другой світовой войны.

Вышнїй Комарник быв ослободженый 6-го октобра 1944-го року почас Карпато-дукляньской операції (КДО), і быв першым селом на теріторії бывшой Чехословакії, котре ослободив 1-ый чехословацькый армадный корпус ґенерала Людвіка Свободы.

„Якраз з той причіны быв у северній части катастра села почас святковань пятой рочніцї Карпато-дукляньской операції, в октобрї 1949-го року, одкрытый Памятник 1-го чехословацького армадного корпусу в СССР з войновым цінтерём, на котрім є похованых 565 членів корпусу павшых почас КДО і наслїдных боїв в просторї северовыходной Словакії,“ повів про аґентуру жытель Вышнього Комарника і історік Воєньского історічного інштітуту в Братїславі Петро Голик.

Одвтогды на тім пєтнім місцї, котре є єднов із головных частей Народной културной памяткы Дукляньске боёвиско, проходять каждый рік святкованя з тым, же на них беруть участь різны делеґації, як і презіденты.

За словами Голика є Вышній Комарник єдным із малого чісла сел на Словакії, котре навщівили майже вшыткы урядуючі презіденты, наперед чехословацькы, пак словацькы. „З вынятком тых, котры урядовали барз куртый період, в якім не быв 6-ый октобер.“

Бывшый презідент Чехословацькой републікы Едвард Бенеш навщівив боёвиско іщі перед наступлїнём до функції. „То было курто перед кінцём Другой світовой войны в апрілю 1945-го року, коли были вєдно з армадным ґенералом Людвіком Свободом посмотрити, якы шкоды наробила война,“ повів Голик.

Як доповнив, пізнїшый презідент Свобода в минулости завітав і прямо до села, жебы познакомити ся з тым, як Вышній Комарник по войнї обновив ся.

Як выраховав Петро Голик, із чехословацькых презідентів найчастїше ходив там Людвік Свобода, Ґустав Гусак і далшы, котры в тім часї урядовали. Із словацькых презідентів приходив Михал Ковач, Рудолф Шустер і Іван Ґашпаровіч, якый на святкованя приходив реґуларно. Презідент Андрей Кіска з нагоды 70-ой рочніцї КДО одкрывав вірну копію оріґіналной скулптуры чехословацькгоо вояка, котра там была, і пак єй вычеряли за іншу скулптуру в дусї совітьской лінії. „Самособов, Дуклю навщівила і презідентка Зузана Чапутова,“ доповнив Голик.

Село має того часу 69 жытелїв, котры подля старосткы Даніелы Штефанцёвой на споминовых подіях беруть участь реґуларно. „Не є то першоряде з причіны офіціалных владных делеґацій ці презідентів, а скорїше зато, жебы такым способом оддали честь памятцї помершых вояків,“ повіла старостка.

Петро МЕДВІДЬ, ЛЕМ.фм, языкова і ґрафічна управа: АРК в СР. Жрідло фотоґрафії: FB/ Svidník-oficiálna stránka mesta.