28. 10. 2022: Русиньскы выданя одпрезентовали на книжковім торгу в Белеградї

Од 23-го до 30-го октобра 2022-го року проходить 65-ый рочник Меджінародного торгу книжок в Белеградї. Як інформовала аґентура Рутенпрес, на тій вызначній културній події были в 26-го октобра одпрезентованы і выданя войводиньскых Русинів.

На промоції русиньскых выдань участників привітали директор Заводу про културу войводиньскых Русинів Саша Сабадош, як і шеф выдавництва НВУ Руске слово Боріс Варґа.

Обидві русиньскы інштітуції, котры занимають ся выдаванём періодічной і неперіодічной пресы, одпрезентовали свої актуалны выданя, котры дотеперь в століцї Сербії не были промованы, але і свіжы новоты, книжкы, котры ішли лем вышли з друку.

Участныма были і дакотры авторы, якы бісідовали на презентації о своїх книжках, іншпіраціях і мотівах, жебы писати.

Одповідный редактор журналу Шветлосц Микола Цап представив у Белеградї і репрінт першого чісла того наукового журналу з нагоды 70-ой рочніцї од ёго основаня. Простор дістали і молоды, кедьже презентована была окрем іншых выдань іщі все свіжа збірка поезії наймолодшой ґенерації русиньскых поетів з Войводины, котра вышла тот рік під назвов Ґенерация З@ (З@ чітай „зет“, як є означована ґенерація людей народженых на кінцю 1990-ых років аж до кінця першой декады нового міленія).

Представили на книжковім торгу і новый правопис з правописным словником, котрый приготовили Михайло Фейса і Гелена Медєші, але і далшы выданя, якых Русины у Войводині мають за остатнїй час много, а вдяка пандемії в попереднїх роках не могли быти презентованы.

 

Петро МЕДВІДЬ, ЛЕМ.фм. Ґрафічна і языкова коректура: АРК в СР.