27. 6. 2017: Америцькый амбасадор: „Знам Русинів.“
Амбасадор Споєных штатів Америкы на Словакії дня 12-го юнія 2017-го року быв участный на цїлословацькім конкурзї в декламації русиньской поезії, прозы, народного росповіданя, малых сценїчных форм і властной творчости – Духновічів Пряшів 2017. Но Адам Стерлінґ не пришов лем міджі русиньскы дїти. 12-го юнія на Словакії святкує ся День Русинів, і зато амбасадор присвятив цїлу свою робочу драгу Русинам.
Іщі в Пряшові, почас конкурзу мав стрічу і з председом Русиньской оброды на Словеньску – Мартіном Карашом, кідьже, як сам повів, є амбасадором на Словакії, де не жыють лем Словаци, а і народностны меншыны і так хоче чути і о проблемах і траплїнях, котры мають тоты меншыны в державі, в котрій моментално выконує діпломатічну службу. Амбасадор пак в робочій дразї присвяченій Русинам продовжовав, кідь навщівив Міджілабірцї, Свідник, Бодружаль.
Знам Русинів
Як інформують свідницькы новинкы „Podduklianske novinky‟, во Свіднику прияв Стерлінґа Ян Голодняк, пріматор міста. І з ним бісїдовав на тему Русинів. Докінця повів, же знать, хто суть Русины.
„Знам Русинів, знам о них дашто. І то нелем зато, же Споєны штаты суть знамы тым, же є там досправды велё еміґрантів і многы походжають зо Словакії і велике проценто суть люди якраз із того реґіону. Значіть і Русины. Двоми з тых найзнамішых, ці вже прямо приселенцїв, або їх дїтей, значіть той далшой ґенерації, мають русиньскы коріня. Суть нима Енді Варгол, котрого музей єм теперь навщівив, або Михал Стренк, котрый быв мариняком і є частёв найіконічнїшой фотоґрафії документуючой бої в ІІ. світовій войнї,“ цітують новбинкы америцького амбасадора.
„Жебы єм оддав честь тому дню (Дню Русинів Словакії, позн. ред.), днешній день зачали сьме в Пряшові… Потім сьме навщівили Міджілабірцї, де сьме окрем іншого посмотрили собі і Музей модерного уменя Енді Варгола а підеме посмотрити і храм в Бодружалї. Тот день є до великой міры досправды Днём Русинів, нелем про самых Русинів, але і про мене,“ продовжовав амбасадор.
Адам Стерлінґ по навщіві Свідника одышов до Бодружалї, русиньского села, в котрім находить ся єдна із найстаршых деревяных церьквей на Словакії. Є то Церьков святого Николая збудована в роцї 1658. В роцї 2008 была записана до Списку світовой дїдовизны UNESCO.
Адам Стерлінґ
Амбасадор Адам Стерлінґ пришов на Словакію в роцї 2016. Як старшый карьєрный діпломат быв в роках 2013 – 2016 заступцём ведучого місії і двоїтый Chargé d´Affaires в Голандії. В роках 2010 – 2013 служыв як заступник ведучого місії і двоїтый Chargé d´Affaires в Казахстанї. Говорить по французькы, іспаньскы, російскы, азербаджаньскы і голандьскы, теперь штудує словацькый язык. Выростав у Ню Йорку і в містї Лавренс в штатї Кансас.
