27. 3. 2024: Підпорте діяльніст ЛАПіТ «Ластівочка»

Лемківскій Ансамбль Пісні і Танця «Ластівочка», якій діє при пшемківскым Кружку Стоваришыня Лемків оголосил збірку фондів на свою діяльніст. Причына? Брак підпоры діяльности ансамблю Міністерством Внутрішніх Справ і Адміністрациі.

«Як певно уж знате, Стоваришыня Лемків не отримало фінансового спертя з Міністерства Внутрішніх Справ і Адміністрациі на шор діяльности в 2024 р., в тым на діяльніст Ансамблю Пісні і Танця Ластівочка. Підпора, яку все давало нам Міністерство, николи не покрывала нашых потреб і все мусіли сме глядати додатковых джерел фінансуваня, але брак основной дотациі спричынят, што не сме в сили діяти так, як до той поры» – пише ся в першых словах в комунікаті оприлюдненым на сайті zrzutka.pl.

Кєд лем можете – поможте

Фактично, Стоваришыня Лемків, як найстарша лемківска повыселенча лемківска орґанізация в Польщы не отримала дотаций з МВСіА на основны проєкты в текучым в 2024 р., якы ведены сут неперерывно од років. Окрем одмовы уділіня фінансуваня дотациі на ансамбль Ластівочка, якій діє в рамках орґанізациі, Стоваришыня Лемків не має грошів на выдаваня часопису «Бесіда» (выдавана є неперерывно од 1989 р.) ци орґанізацию тогорічного Медженародного Бієнале Лемківской/Русиньской Культуры в Креници (перше одбыло ся в 2000 р.).

Як перша оголошена была як раз збірка фондів на підпору діяльности ансамблю Ластівочка, якій творят не лем молодіж і дорослы, але тіж діти – ґрупа Ластівчата. Цілый колектив рахує близко 80 осіб.

«Брак фінансовых середків може поважні ограничыти діяльніст ансамблю, прото звертаме ся до Вас з прошыньом о фінансову підпору. Николи не корыстали сме з той формы фінансуваня і не є то для нас комфортове, але завдякы тому зможеме утримати міц лемківской культуры і єй меджепоколіньовый переказ» – апелюют.

Треба тіж додати, што факт, же Ластівочка ци «Бесіда» не отримали фінансуваня на свою діяльніст, являт ся радше більшым, системовым проблемом вшыткых меншын. Здає ся, же систем повинен быти так зробленый, жебы меншыны могли мати заґарантуване шторічне фінансуваня на тоты проєкты, якы сут в іх діяльности постійны і певны. До того всякы формализмы повинны быти знесены до мінімум.

Ансамбль з історийом

Ансамбль был основаный в 2001 р. при Кружку Стоваришыня Лемків в Пшемкові. Початково ґрупа называла ся Кружок. Через вшыткы рокы свойой активности з камерального дітячо-молодіжного колективу Ластівочка выросла до єдного з найбарже ціненых лемківскых фольклорных ансамблів в Польщы і поза єй границями.

Як стоваришыньовый ансамбль, Ластівочка є шторічном «ґаздыньом» осінньой подіі – Стрічы Трьох Поколінь з Лемківском Культуром.

В 2017 р. Ластівочка отримала цертифікат CIOFF. На ріжных фестівалях і концертах, в котрых брала дотепер участ, отримувала выріжніня – приміром на Загальнопольскым Фестівали Капель і Народных Співаків в Казімєжу і Загальнопольскым Співочым Фестівали «Земля і Пісня» в Шпротаві. До шумного доробку мож додати іщы «бронзовый топорец» з 45. Медженародного Фестівалю Фольклору Гірскых Земель в Закопаным. Вкінци тіж, влони колектив был нагородженый престіжным Нагородом ім. Оскара Кольберґа.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)