27. 12. 2021: Проґрам Театру Александра Духновіча в Пряшові на місяць януар 2022
12-го януара 2022
12 стілців (Велика сцена, 19.00 год.)
Рафінована карікатура совєтьской сістемы і людьского ненажерства ся злучує в історії Іпполіта Воройбанинова і великого комбінатора Остапа Бендера, котрых наганяня ся за покладом приведе до різных небезпечных і комічных сітуацій.
14-го януара 2022
Фараоны (Велика сцена, 19.00 год.)
Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана вість о вычеряню позіцій. Там, де стояли хлопи, будуть жены і наопак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых ролей.
19-го януара 2022
Ани мак (Велика сцена, 19.00 год.,)
Зуна, іншпірована геройков із роману Франтїшка Швантнера під назвов Невіста полонин, боює із стереотіпами одношіня чоловіка 21-го столїтя ку природї. Як змінили ся односины чоловіка і природы, і як овпливнила ґлобалізація наше (нелем) енвіроманталне оточіня? Вкаже му путь вонка із цїлый час прискорюючого ся і неутримательного колобігу? Лиця нам освітлює світло екрану і природа нам счезать перед очами. Забываме на то, же якраз она є нашов частёв. Ці конзум є правилна путь? Є профіт основнїшый, як охрана нашой природы? Жывота? Мате обще час… жыти ту?
21-го януара 2022
„Шестеро персонажів у пошуках автора“ (Велика сцена, 19.00 год.,)
На фонї театралной пробы і нервозного режісера одогравать ся траґічна історія персон розпаднутой родины, котры жыють драмов і глядають смысел правды і ілузії на сценї. Пєса є в україньскім языку.
26-го януара 2022
Детектор лжи (Велика сцена, 19.00 год.,)
Повісте собі, же о манжелстві знате вшытко? Досправды то так є? Або… може о манжелстві не знаме абсолутно ніч? І манжелство може быти єдна велика незнама… А притім прекрасна комедія! Находиме ся в обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити дїла, котры суть на першый погляд баналны. А пізнїше і фаталны. Бо уж по хвілї знайде ся меджі небом і землёв. Лїпше повіджено – посеред таємніць тридцятьрочного манжелского одношіня. Тадь хто бы ся сперав покушіню спознати істинну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых героїв, метать їх до неочекованых сітуацій. Но публіка ся барз файнї бавить! Та ці то в жывотї аж таке вітязтво? Дізнати ся о нашых близкых досправды вшытко? Тверду правду? Як скінчіть тота сеанса несподїванок? Подарить ся загасити тот ґротесковый пожар манжелскых боїв? Буде годен в многім простодушный гіпнотізер втечі із пазурів манжелского абсурду? Так лож, як і туга одкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміцї акторьской кооперації, іскривости словных несподїванок. Іде о театралный вечур повный доброй забавы, усміху, котрый вам з часу на час замерзне на ротї, сміху і радостного чутя ся може зачати!
28-го януара 2022
Домашнє гнїздо (Велика сцена, 19.00 год.,)
Комедія о нас і дїлах, котры нас роблять тым, кым сьме: нашых родічах, нашых любвах, нашых несповненых снах і о тых, котры наповнили ся, хоць сьме ани не надїяли ся на тото, о надїї – бо будьяк кліше і спрофанована є, все вмерать послїдня, ці ся нам то любить, ці ніт. Комедія нелем о Русинах і Выходї, а о каждім (і про каждого), хто колись мусив вернути ся домів, хто колись з дому хотїв втечі, хто даколи у своїм жывотї холем на даякый час став частёв даякого домова і взяв на себе дакотру роль: родіча, дїтины, сородинця, мужа…
Обертаме вашу увагу, же проґрам може быти зміненый на основі епідемічных обставин і наряджінь.
Петро МЕДВІДЬ, ЛЕМ.фм, ґрафічна і языкова управа: ред. АРК в СР.
